Guz.9 ki TaraHi ghazal, Abdulqayyum Sahil, Jeddah

[abdulqayyum sahil]

MuHtarameen o MuHtaramaat
aHbaab-e-sukhan,

Aadaab o Tasleemaat,

Guzarish 9 per apni TaraHi ghazal pesh karrahaa hooN. Ummeed ke aap apne giraaNqadar tabSiraoN se navaazkar khaaksaar ko shukriyah adaa karne kaa mauqaA denge.

GHAZAL;

Hijr kaa ham malaal kyaa karte
Zikr-e-shauq-e-viSaal kya karte

Koii caani nahiN zamaane meiN
Pesh uski micaal kyaa karte

Chashm-e-purshauq meiN wo taab kahaaN
Deed-e-Husn o jamaal kyaa karte

Naqsh ham ne kiyaa nah aankhaoN meiN
Manzar-e-maah o saal kyaa karte

Koii baadal idhar nahiN aataa
Hasrat-e-barshagaal kyaa karte

Parda-e-naaz thaa bachashm-e-karam
Ik nazar kaa sawaal kyaa karte

Teer-e-mizhgaaN ne kardiyaa ghaayal
Be-sipar ham thay Dhaal kya karte

Jo muqaddr meiN thii nahiN apne
Us khushi per malaal kyaa karte

Lafz uske liye nah thay :SaHil:
midHat-e-khush-khiSaal kyaa karte
=======


Khair Andesh,
SaHil,

[Ibn-e-siddique]

saHil saHib

salaam arz hai

taraHi misre per aap ki ghazal pasand aayee. tazmeen ka she'r bhi acha hai.

daad qubool keejiye

amjad