قارئین کرام ایک تین سال پرانا کلام پیشِ خدمت ہے امید ہے پسند آئے گا اپنی آرا سے نوازیے ، شکریہ
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
محبتوں پہ اگر تجھ کو اعتبار رہے
تجھے گلہ نہ رہے زندگی سے پیار رہے
نگاہ رکھتے رہے دوسروں کے عیبوں پر
پھر آئینے میں کھڑے خود پہ شرمسار رہے
بہت غرور تھا جن کو بھی اپنی حشمت کا
وہ اپنے حشر پہ آخر کو اشکبار رہے
تباہ کر کے مجھے چین کھو دیا اُس نے
قرار پانے کو پل پل جو بے قرار رہے
نصیحتوں کا تری آج بھی اثر ہوگا
ادب شعار ! ادب پر جو اختیار رہے
تم اس طرح سے مری زندگی میں مت آؤ
کہ التفاتِ نظر کا بس انتظار رہے
تمھاری بزم میں ہر بار جگ ہنسائی ہوئی
تمھاری بزم سے لوٹے تو دلفگار رہے
خیالؔ جان لے ہے کون اب ترا دشمن
جو آستیں میں تری چھپ کے بار بار رہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
توجہ کا طلبگار
اسماعیل اعجاز خیالؔ