قارئین کرام ایک تازہ کلام پیشِ خدمت ہے امید ہے پسند آئے گا ، اپنی آرا سے نوازیے ، شکریہ
عرض کیا ہے
۔۔۔۔۔۔۔۔۔۔۔۔۔۔۔۔۔۔۔
لُوٹ کے مال کو جب رب کی عنایت لکھنا
جھوٹ کو سچ کی جگہ دے کے صداقت لکھنا
ہم سمجھ لیتے ہیں لہجے پسِ دشنام گوئی
تم اسے اپنی عبارت میں مروّت لکھنا
طعن و تشنیع گلہ شکوہ لسانِ نفرت
اس کو تہذیب و تمدّن کی ثقافت لکھنا
فحش گوئی میں ہر اک حد سے گزر جانا تم
پھر ادب میں اسے لفظوں کی لطافت لکھنا
اپنے ذہنوں میں تراشے ہوئے ہیں بت جو جو
مان کر ان کو خدا اپنی کرامت لکھنا
بے ادب جاہل و گستاخ ہیں عزّت والے
ان سے ہم کو ہے محبت و عقیدت لکھنا
عمر دنیا کے جھمیلوں میں گزر جائے جب
بعد مرنے کے ملے بخشش و رحمت لکھنا
جھوٹ کو شان سے چہرے پہ سجاتے ہیں لوگ
اس کو اس دور کے لوگوں کی ضرورت لکھنا
تم خیالؔ آج جو بے زار ہوئے بیٹھے ہو
کل ملے وقت تو اشعارِ محبت لکھنا
۔۔۔۔۔۔۔۔۔۔۔۔۔۔۔۔۔۔۔
آپکی توجہ کا طلبگار
اسماعیل اعجاز خیالؔ