چمن میں بھیگ کے شبنم سے گل نکھر جائیں

[ismail ajaz]

قارئین کرام آداب عرض ہیں ایک تازہ کلام پیشِ خدمت ہے امید ہے آپ احباب اپنی محبتوں سے نوازیں گے
عرض کیا ہے
۔۔۔۔۔۔۔۔۔۔۔۔۔۔۔۔۔
چمن میں بھیگ کے شبنم سے گل نکھر جائیں
محبتوں کے سمندر میں ہم اتر جائیں

سنبھل سنبھل کے چلو تم بھی قافلے والو
کہ آبگینے نہ یوں ٹوٹ کربکھر جائیں

تم اپنی زیست کے دو چار پل ہمیں دے دو
تمام زندگی قربان تم پہ کر جائیں

ہمارے دل میں بسے تم رہو سدا کے لیے
تمہارے دل میں ہمِیں ہم فقط ٹھہر جائیں

بس ایک بار محبت کا تم کرو اظہار
حیات تم پہ لُٹا کرخوشی سےمر جائیں

کٹھن بہت ہے اکیلے میں زندگی کا سفر
ہم ایک ساتھ ہر اک راہ سےگزر جائیں

ہیں ایک دوسرے کے واسطے ہم آئینہ
تو ایک دوسرے کو دیکھ کر سنور جائیں

خیالؔ زندگی بس ایک بار ملتی ہے
تو کیوں نہ ہم بھی اسے یادگار کر جائیں
۔۔۔۔۔۔۔۔۔۔۔۔۔۔۔۔۔
آپ کی محبتوں کا طلبگار
اسماعیل اعجاز خیالؔ