ہم اہلِ محبت کو نہیں ایسے سزا دو

[ismail ajaz]

یہ کلام ۲۲ مئی ۲۰۲۳ میں لکھا گیا تھا
قارئین کرام ایک تازہ کلام پیشِ خدمت ہے ، امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔۔

چہرے سے نقاب اپنی شرافت کا ہٹا دو
تم کیا ہو حقیقت میں زمانے کو دِکھا دو

تم پر ہے جفاؤں کا ہر اک سَمت سے الزام
آج اپنی وفاؤں کا یقیں ہم کو دلا دو

چھپ چھپ کے بڑھاتے ہو رقیبوں سے مراسم
ہم اہلِ محبت کو نہیں ایسے سزا دو

نخوَت سے کہاں ہوتا ہے الفت کا تعلّق
نفرت کی جو دیوار کھڑی ہے وہ گرا دو

اس شرط پہ ہوگا ہمیں الفت پہ بھروسا
تم دل میں ہَوَس کو نہ محبت کی جگہ دو

محفل میں بیاں کرتے ہو تم عیب ہمارے
ہے ہم سے محبت تو محبت سے بتا دو

تم جھوٹ کے آئینے میں چہرہ ہو سجائے
آئینہ حقیقت کا کبھی خود کو دِکھا دو

ہے تم سے محبت کا کیا ہم نے ہے اظہار
گرہم سے محبت ہے محبت ہی صلہ دو

اک روز چلے جانا ہے دنیا سے سبھی نے
پیغام خیالؔ آج محبت کا سُنا دو

۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ