Lafz par Ashaar#7--" MAUSAM"

Post by **Hashmat Usmani** » Fri Apr 22, 2005 12:57 pm

mil bhii jaate haiN to katraa ke nikal jaate haiN
haaye! mausam kii taraH dost badal jaate haiN

Bashiir Badr

Post by **Hashmat Usmani** » Fri Apr 22, 2005 11:05 pm

chaman roye, haNse shabnam, biyaabaaN par nikhaar aaye
ek aisaa bhii nayaa mausam mere parvar-digaar aaye

Qamar Jalaalwii

Abdullah Nazir · Post by **Abdullah Nazir** » Fri Apr 22, 2005 11:46 pm

churaalo umr miri aek shaam hii kyaa hei

agar yeh piyaar kaa mausam tumheN buraa nah lage

Nazir.

Post by **najma** » Sat Apr 23, 2005 12:01 am

sard mausim meiN kaheeN saaNs na jamne paey
jism ke khol meiN ik shola, sadaa ka rakhna

Post by **Hashmat Usmani** » Sat Apr 23, 2005 12:10 am

jaate mausam kii 'ajab tasviir hai chaaroN atraaf
darmiyaaN us ke hai ik pattaa haraa hotaa huaa

Hari Manchanda "Bani"

Post by **Hashmat Usmani** » Sun Apr 24, 2005 1:27 am

achchhaa saa koii mausam, tanhaa saa koii 'aalam
har waqt kaa ronaa to be_kaar kaa ronaa hai

Nida Faazli

Post by **Hashmat Usmani** » Sun Apr 24, 2005 4:00 am

aaaaaaaawwwww Saaraa...na roiye

kaaNToN kii chubhan paii, phuuloN kaa mazaa bhii
dil dard ke mausam meN royaa bhii, haNsaa bhii

Sundar Malik "Gumnaam"

Post by **Hashmat Usmani** » Sun Apr 24, 2005 10:33 pm

kabhii gunchaa, kabhii sho'la, kabhii shabnam kii taraH
log milte haiN badalte huye mausam kii taraH

Ra'na "SaHrii"

Post by **Hashmat Usmani** » Mon Apr 25, 2005 3:28 am

zulm ke kaale baadal se Darnaa kaisaa
ye mausam to aane jaane vaale haiN

Majid Deobandi

Post by **Hashmat Usmani** » Mon Apr 25, 2005 3:47 am

kaaNToN kii chubhan paii. phuuloN kaa mazaa bhii
dil dard ke mausam meN royaa bhii, haNsaa bhii

Surendra Malik "Gumnaam"

Post by **Hashmat Usmani** » Mon Apr 25, 2005 4:10 am

biitaa diid ummiid kaa mausam, Khaak uRtii hai aaNkhoN meN
kab bhejoge dard kaa baadal, kab barkhaa barasaaoge

Faiz AHmad "Faiz"

Abdullah Nazir · Post by **Abdullah Nazir** » Mon Apr 25, 2005 3:29 pm

kitne mausam aaye gaye , ham dil waalaoN ke jeevan meiN

tujh se jitnaa piyaar kiyaa thaa, us se ziyaadah aaj bhii hei.

Nazir.

Post by **Hashmat Usmani** » Tue Apr 26, 2005 1:14 am

udaas kaaGhazii mausam meN rang_o_buu rakh de
har ek phuul ke lab pe meraa lahuu rakh de

Bashir Badr

Post by **Hashmat Usmani** » Tue Apr 26, 2005 5:54 am

biit gayaa saavan kaa mahiina, mausam ne nazareN badalii
lekin, in pyaasii aaNkhoN meN ab tak aaNsuu bahte haiN

Habiib Jaliib

Post by **najma** » Wed Apr 27, 2005 11:08 am

bahar qadam na rakhna tum is andherii shab meiN :?
pehle ye soch lena mausim hay baarishoN ka

khawar qureshi