• Surkh Chilman meiN haseeN TajMahal ho jaise....!

Posted: **Sun Jan 02, 2005 12:58 pm**

Salaam Ahl-e-bazm!

Kamal Hatvi ka kalaam apne andaaz mein pesh kar rahi hoon...ummeed hai pasand aayega :)

Shumaila

ROMAN VERSION

Surkh chilman meiN haseeN Taj Mahal ho jaise
Aap ka husn mohabbat ki ghazal ho jaise

Aao kuch der zamaane se kahiN duur chaleiN
YuN jiyaa jaaye keh bas aakhri pal ho jaise

kyoN nahi aata tujhe meri mohabbat pe yaqeeN?
kyoN ye lagta hai tere maaThe pe bal ho jaise?!

yuN qareeb aayeiN keh bichReiN to koi ranj na ho
saaNs lena bhi mohabbat meiN khalal ho jaise

yuN uThii jaise koii barq chamak jaaye kahiN
ik nazar saare sawaalaat ka hal ho jaise !!!

Posted: **Sun Jan 02, 2005 1:47 pm**

Shummu jee ..

bohat bohat shukria kay aap nay KAMAL HATVI ka aik khoobsurat namoona-e-kalam share kia ...

Khush rahain

Khair Andesh

Raheel Ahmed

Posted: **Sun Jan 02, 2005 1:54 pm**

salaam Shummu,

ari waah! kia Ghazal paRhvaaii hai aapne hameN...yuNki, maza aa gayaa. waqa'ii baRii dil_kash hai. mujhe yeh ash'aar bahot pasand aaye:

aao! kuch der zamaane se kahiiN duur chaleN
yuuN jiyaa jaaye ki bas aakhrii pal ho jaise

yuuN qareeb aayeN ki bichhReN to koii ranj na ho
saaNs lenaa bhi moHabbat meN Khalal ho jaise

yuuN uThii jaise koii barq chamak jaaye kahiiN
ik nazar saare sawaalaat ka Hal ho jaise!!!

shukria itnii Khoob_soorat Ghazal share karne kaa.

Hashmat

Posted: **Sun Jan 02, 2005 9:19 pm**

asslamualikum

buhat hi umdah shuu thanx for sharing

Posted: **Fri Jan 07, 2005 1:00 pm**

THANX AAP SAB KA! :D