• Aek maAmooli sii Ghazal Abdullah Nazir.

Posted: **Mon Jul 11, 2005 9:10 pm**

MuHtarameen o MuHtaramaat
Ahbaab-e-Sukhan,

Purkhuloos Tasleemaat,:rose

Apni aek maAmooli sii taazah ghazal pesh karrahaa hooN aur ummeed kartaa hooN ke aap apni qeemati aaraa se navaazenge. Shukriyah.

G H A Z A L roman meiN

Be-khabar thay dushman se jaane kiyuN zamaane tak
Barq aagaie aakhir apne aashyaane tak

Aaj hii Ataa karde phool kuch tasalli ke
Saans kaa bharousa kyaa kal bahaar aane tak

muRke Daikhle zaalim ik nazar musaafir ko
kaun zindah rehtaa hei tere muskuraane tak

shamA-e-ishrat-e-hastii apni bujh gaiee houti
chain jab nahiN usko meraa jee jalaane tak

Ishq kii Haqeeqat kaa kuch patah nahiN chaltaa
Husn kii adaa'oN se dil pah chouT khaane tak

Ghairat-e-mah o anjum hei tiri galee lekin
Kyaa sitam nahiN houte dar pah sar jhukaane tak

Uske abroo-e-khush-kham purshikan heiN kiyooN Nazir
Ghat gaiee muHabbat kiyuN dousti baRhaane se

Aapka Mukhlis,
Nazir.

Posted: **Tue Jul 12, 2005 9:03 am**

Abdullah bhai salaam e masnoon
Aaap ki taaza ghazal kisi taza wardaat ki ghammazi kar rahi hai:) (mizahan arz kia hai). har sher besakhta hai . khas taur par Matla aur maqta bahut dil ko lagay.
shukria
Mahtab Qadr

Posted: **Tue Jul 12, 2005 10:54 am**

Muhturam Abdullah nazir

aap ki ghazal bay had pasand ayee..

tamam ashaar apni jagah bay misal hein

kis qadar daad hoon keh soraj k oroshini dikhanay kay mutaradif hay

waqar masood