yaaraan-e-bazm: aadaab!

kal hee a'zeezee Najm Hashmee ne pooch`aa keh kyaa maiN idh`ar Mall naheeN gayaa? aur agar gayaa to kyaa koyee naz^m yaa Ghazal naheeN huyee?

Mall to maiN yaqeena" jaataa rahaa hooN aur zabaan-e-Haal se yeh bh`ee kehtaa huwaa waapas aayaa hooN keh:

:Khoob-rooyoN se yaariyaaN nah gayeeN!: (Hasrat Mohani)

lekin whaaN kee she'ree sauGhaat pesh-e-Khidmat karte huwe Zaraa jh`ijh`ak rahaa th`aa keh shaayad aap ab tak :bore: ho gaYe hoN ge. lekin Najm ne ba-Z^id kahaa keh maiN woh taazah naz^m Z^aroor sunaa,ooN jo do din qabl hee huyee hai. woh naz^m likh` rahaa hooN. agar aap ko pasand nah aaYe to apnee tanqeed kaa ruKh Najm kee jaanib rakh`iYe gaa kyoN.k unhoN ne hee mujh` ko aap par yeh aazmaa,ish musallat^karne kee tarGheeb dee hai!

ab naz^m suniYe aur apnee raaYe likh` kar shukriyah kaa mauqa' i'naayat keejiYe!

Sarwar A. Raz "Sarwar"
===============================
Behlaawe!

SubH-e-Gham ne oRhee hai ph`ir se shaam-e-tanhaayee
meree be-kasee yaa Rab! mujh` ko yeh kahaaN laayee?
yaad meN kisee kee maiN ho gayaa hooN saudaayee
dard hai keh seeneh meN SubH-o-shaam paltaa hai!

sehmee sehmee woh naz^reN, sarsaraatee woh chilman!
kaaNpte huwe woh lab, do diloN kee woh dh`aRkan!
rezah-rezah woh chehre, taar-taar woh daaman!
koyee Khwaab meN aa kar dil miraa masaltaa hai!

woh hawaa-e-kaif-o-kam, lehlehaataa woh aaNchal!
muskuraate woh lamHe, gungunaatee woh paayal!
aag woh tamannaa kee, HasratoN kee woh halchal!
raNg roo-e-hastee kaa dam-ba-dam badaltaa hai!

ab kahaaN rahe woh din, ab kahaaN woh raateN haiN!
us ko yaad kar lenaa Khwaab kee see baateN haiN!
a'ashiqee kee baazee meN roz-o-shab kee maateN haiN!
HasratoN kaa ik t^oofaaN rooH meN ubaltaa hai!

shaam-e-aarzoo hai aur aaftaab Dhaltaa hai!
dard hai keh seeneh meN SubH-o-shaam paltaa hai!
koyee Khwaab meN aa kar dil miraa masaltaa hai!
raNg roo-e-hastee kaa dam-ba-dam badaltaa hai!
HasratoN kaa ik t^oofaaN rooH meN ubaltaa hai hai!
ik chiraaGh bujh`taa hai, ik chiraaGh jaltaa hai
lekin aisee yaadoN se dil kahaaN behaltaa hai!
=============================
Sarwar A. Raz "Sarwar"

Najm SaaHeb: aadaab!

haaN SaaHeb! yeh aap kee hee mehrbaanee th`ee jo naz^m ho gayee. to ab yeh aap ke hee naam hai! paZeeraayee ke liye ek lafz^ :shukriyah: kaa hai jo is qadar ghisaa piTaa hai keh kyaa kahiYe. lekin aur koyee chaarah bh`ee naheeN hai. so leejiYe "SHUKRIYAH"!

Sarwar A. Raz "Sarwar"

a'zeezah Sara SaaHebah:aadaab!

aap kaa mufaSSil tabSirah dekh` kar dil bohat Khush huwaa. ab naubat yeh aa gayee hai keh beshtar dost meree taKhleeqaat se baalaa hee baalaa guZar jaate haiN. koyee kuch` likh` detaa hai to achh`aa lagtaa hai! dilee shukriyah qubool keejiYe.

aaj kal sab hee Urdu meHfileN sust chal rahee haiN. mujh` ko i'lm naheeN keh aisaa kyoN hai. albattah sab Urdu-doston se guZaarish hai keh woh is jaanib tavajjuh deN aur Urdu kaa naam baland kareN.

Nazir SaaHeb bh`ee idh`ar kuch` dinoN se Khaamosh haiN. un kee waapasee kaa intiz^aar hai.

Sarwar A. Raz "Sarwar"

a'zeezah Raji: salaam

naz^m pasand karne aur daad dene ke liYe mamnoon hooN. ab maiN makaan tabdeel kar ke is t^ilismaatee Mall se door jaa rahaa hooN. kyaa Khabar keh wahaaN aisaa koyee mall hai bh`ee keh naheeN! dekh`iYe kyaa hotaa hai.

Sarwar A. Raz "Sarwar"