janaab Irfan Barabankawi SaaHeb: aadaab!

muddat ke ba'd aap ko dekh` rahaa hooN. kahaaN rahe ab tak? Ghazal paRhee aur pasand aayee. chand baateN likh` rahaa hooN jo Sirf mere Zaatee Khayaal haiN. aur bas!
----------------------------------
ghar chuTaa kyaa, houi uftaad ye be-chaaraoN per
(gh`ar kaa ch`uTnaa huwaa uftaad yeh be-chaaroN par)
tuhmat-e-dasht-navardi lagi naadaaraoN per
-----------------------------------
Zarb dushman ne lagaayi miri deevaaraoN per
yaAni Hamlah kiyaa us ne mire aacaaraoN per

pehlaa miSra' to Theek hai lekin :aacaaroN: kaa qaafiyah kuch` kh`ap naheeN rahaa hai. waise yeh Sirf meraa Khayaal hai.
----------------------------
Haye kyaa khoob yeh andaaz-e-maseeHaayi hei
Ik nazar Daal gaye aake wo beemaaraoN per

waah! daad qubool keejiYe.
-------------------------------------
Haal furqat kaa nah ab aap khudaaraa poocheN
yuN samajh leejiye leTaa hooN maiN angaaraoN per

maZ^moon bohat puraanaa hai aur bayaan bh`ee aisaa hee puraanaa! ek naz^ar aur dekh` leN to harj naheeN hai.
--------------------------------------
be-hunar saare navaaze gaye eA'zaazaoN se
aur navaazish nahiN koii houi fankaaraoN per

iz^haar-e-Haqeeqat hai!
---------------------------------
baa-Hamiyyat sabhi sar apnaa kaTaadete heiN
aanch aane nahiN dete kabhi dastaaraoN per

nakhudaa'aoN ne Dubooye the safeene apne
aur ilzaam lagaaye gaye manjdhaaraoN per

yeh she'r achh`e haiN. pasand aaYe!
-----------------------------
micl unke koii tamceel kahaaN se laauN
"naazuki khatm hei un phool se rukhsaaraoN per"

:un ke micl koyee tamceel: ya'nee kyaa? :micl, tamceel: to ek hee cheez haiN!
---------------------------
be-Hijaabaanah nikal aaye wo :IrfaaN: baahar
barq girjaaye nah dekho kahiN gulzaaraoN per

yeh maZ^moon bh`ee ab bohat kahaa jaa chukaa hai. majmoo,e'e t^aur se Ghazal pasand aayee. daad HaaZ^ir hai.

Sarwar A. Raz "Sarwar"

mohtaramee

SARWAR SAHEB

adab-o-ihtiram

aaj aik taweel muddat ke baAd aapka nawazish namah dekha. bahut khushi hoi. ghazal per aapka tabsirah bahut munasib hai. is tabsirah ki raushni meiN apni ghazal per nazr-e-cani karooNga .

micl unke koi tamceel kahaN se laaooN

(yahaN mera maTlab yeh tha ke unke (yani un rukhsaroN ke baraber ki mical kahaN se laaooN) . ab khayal aaya ke isko yuN bhi kaha jasakta tha ke " unke jaisi koi tamceel kahaN se laaooN ". shayad yeh ziyadah behtar hota.

bahar haal aapke tabriah ka bahut bahut shukriyah. ummeed hai ke ayendah bhi aap apna qeemti waqt nikalkar mujko apni aara se nawazeiNge. shukriayah.

khair andaish

irfan barabankwi

Haye kyaa khoob yeh andaaz-e-maseeHaayi hei
Ik nazar Daal gaye aake wo beemaaraoN per

Haal furqat kaa nah ab aap khudaaraa poocheN
yuN samajh leejiye leTaa hooN maiN angaaraoN per

be-hunar saare navaaze gaye eA'zaazaoN se
aur navaazish nahiN koii houi fankaaraoN per

nakhudaa'aoN ne Dubooye the safeene apne
aur ilzaam lagaaye gaye manjdhaaraoN per

micl unke koii tamceel kahaaN se laauN
"naazuki khatm hei un phool se rukhsaaraoN per"

be-Hijaabaanah nikal aaye wo :IrfaaN: baahar
barq girjaaye nah dekho kahiN gulzaaraoN per

wahh bahut umda..bahut khoob...ghazal ke ye ash'aar bahut bhaaye..daad haazir hai Irfan sahab

Shumaila