• ghazal, misra e tarah:wafa kare na kare phirbhi yar apna hay

Posted: **Thu Mar 16, 2006 10:31 pm**

aik ghazal kay saath hazir huwa hooN............ehbab kee araa ka muntazir rahoonga:::: khul ke qainchee chalayeay.............jo bura lagay nishandahee kijiay..................
aapka dost
sabeehuddin shoaiby

ye dil jo aaj bohat beqarar apna hay
naseeb aaj bhee phir intizaar apna hay

jo yaar khush hay tu phir burg o baar apna hay
wagarna ghur wohi burq o sharar apna hay

wafa guzeedoN meN jab se shumaar apna hay
her aik shakhs yahaN ghum gusaar apna hay

janab e mush ka ye kehna hay bush ke dauray per
wafa karay na karay phir bhee yaar apna hay

ye teray ishq ka faizan hay meray humdum
gali gali meN jo ye ishtahar apna hay

badan meN zehr jo utra wo ghair ka kab hay
jo aasteeN meN chupa hay wo maar apna hay

kisee ko yaad kareN kia, kisay bhulayeN hum
ke apne dil pe kahaN ikhtiyar apna hay

badal ke roop jhalakta hay apnay she’roN meN
gham e hayat, gham e rozgar apna hay

watan ka baal bhee baNka na ker sakay koee
ke is ke gird ye sangeeN hisaar apna hay

sabeeh khud meN bohat mohtaram heN hum ab bhee
waqar ab bhee kahiN burqarar apna hay

Posted: **Fri Mar 17, 2006 8:32 am**

Mohtaram Sabeeh Sahib
ASAK
Aapki ghazal ka har shair bohat khoob hai. Meri daad aur mubarakbad
qubool keejiye.
Shukria
Salem Bashwar

Posted: **Sat Mar 18, 2006 12:54 am**

sbashwar wrote:Mohtaram Sabeeh Sahib
ASAK
Aapki ghazal ka har shair bohat khoob hai. Meri daad aur mubarakbad
qubool keejiye.
Shukria
Salem Bashwar

walaikumassalam,
salem bhaeee............ghazal pasand kerne ka bohat shukriyaaa

Posted: **Sat Mar 18, 2006 12:55 am**

sara_j wrote: tahree misre per aapki girah parhte hi besakhta hans paRi.........bohat khoob! is umda kavish per daad qubool keejiye.

meray aur dostoN ne bhee yehee kaha hay girah ke baray meN ...................ke mood se hut ker hay...................

Posted: **Tue Apr 25, 2006 11:18 am**

Aadaab, Sabeeh SaaHeb:

miSrah-e-taraH peh aur meHfil-e-suKhan ke mushaire meN bohat se kauna-mashq-o-SaaHeb-e-ilm eHbaab ne bhi HiSSah liyaa thaa aur Khoob ghazleN pesh keeN so mere Khayal se is ghazal par tanqeedii jaahizah tu voh eHbaab hee d'aal sakte heN.
ham Sirf daad dene ke liye Haazir hoove heN so ek achii koshish par daad pesh-e-Khidmat hai.

weise yeh tu sach hai keh miSraH-e-taraH kee girah ne is she'r ko Ghazal ke rang se judaa kar diyaa hai lekin hai pur-lutf so is girah par meree jaanib se special daad qubool keejiye.

Khush rahiye

Khair andesh

Zahida Raees :Raji:

Posted: **Tue Apr 25, 2006 11:42 pm**

SabeeH jee. Khoob girah !

ham daad to de hi chuke haiN na ? so ab sirf shukriya and AH

Zia Baloch