• dard ne le liyaa panaahoN meN

Posted: **Wed Jul 12, 2006 4:21 pm**

Aadaab, meHfil:

apnii maSroofiyat ke sabab is meHfil meN baaqahidgii se aana zaraa kam ho gaya hai.

aaj bohat dinooN ba'ad yeh soch kar keh apnii maujoodgii ka eHsaaas dila dooN, apnii kuch haftooN qabl kee ek tuk bandii le kar HaaZir hoovii hooN.

apnii aaaraa se zaroor navaaziye gaa.

mamnoon-o-taalib-e-dua'a

Zahida Raees :Raji:

Ghazal:
~~~~~~~
1. dard ne le liyaa panaahoN meN
kaash keh rehte hum dua'aoN meN

2. baRh rahaa hai yaqeen kyoN mujh meN?
gar acar hee naheeN dua'aooN meN?

3. itnee taaqat naheeN keh jhulsaa de
teez sooraj kee in shu'aa,ooN meN

4. tum ne shaayad mujhe Sadaa dee ho?
ko`ee aahaT see hai fiZ^aaoN meN

5. qurbatooN kaa yaqeen kaise ho?
dooriyaaN baRh ga,ee nigaahoN meiN

6. kuch wiracat kee, kuch riwaaYat kee
bheRiyaaN paR gayii heN paah,ooN meN

7. fikr ko wusa'ateN naheeN miltee
soch bhaTke yooNh`ee Khalaa,ooN meN

8. ham ne likh~ee naheeN siwaa iske
jo bitaayii hai dhoop chaa,ooN meN

9. thee bahaarooN meN talKh~iyaaN itnee
lutf baRhtaa rahaa Khizaa,ooN meN

10. zindagi hai gurez paa :Raji:
dil ke andar basee hawaa,ooN meN

(Zahida Raees :Raji: )

Posted: **Sat Jul 15, 2006 8:38 am**

MuHtaramah
Raji SaaHibah,

tasleemaat,

aapki ghazal pasand aayi jiske liye daad qubool farmaayiye.

khair andesh,
Nazir.

dard ne le liyaa panaahoN meN

dard ne le liyaa panaahoN meN

daad qubool keejiye