kisee Gham.gusaar ki maHnatoN kaa yeh khoob meN ne Silah diyaa
keh jo mere Gham meN ghulaa kiyaa usay meN ne dil se bhulaa diyaa

jo jamaal-e-roo-e-Hayaat thaa, jo daleel-e-raah-e-nijaat thaa
usee raahbar ke naqoosh-e-paa ko musaafiroN ne miTaa diyaa

tire Husn-e-khulq ki ik ramaq miree zindagee meN nah mil sakee
meN isee meN khush hooN keh shahr ke dar-o-baam ko to sajaa diyaa

meN tire mazaar ki jaaliyoN hi ki madHatoN meN magan rahaa
tire dushmanoN ne tire chaman meN khizaaN kaa jaal biCHaa diyaa

yeh miree a'qeedat-e-be.baSar , yeh miree iraadat-e-be.camar
mujhe mere da'wa-e-i'shq ne nah Sanam diyaa nah khudaa diyaa

tiraa naqsh-e-paa thaa jo rahnumaa to Ghubaar-e-raah thee kahkashaaN
usay Kho diyaa to zamaanay bhar ne hameN naZ'ar se giraa diyaa

mire rahnumaa tiraa shukriyah karooN kis zabaaN se bhalaa adaa
miree zindagee ki aNdhairee shab meN chiraaGh-e-fikr jalaa diyaa

kabhee ai :Inaayat:-e-kam naZ'ar tire dil meN yeh bhi kasak huwee
jo tabassum-e-rukh-e-zeest thaa usay tere Gham ne rulaa diyaa

----------------------------------------------------Professor Inaayat Ali Khan