Assalam o alaikum
dosto

aik aur tarhi kalaam aapkay hawaalay kar rahay haiN

gar qubool uftad zahay........

arz kiya hai.......

khaak samjhega yeh insaan keh jannat kya hai
kisko kehtay haiN khudaa aur hukoomat kya hai

jis zameeN kayliye jangeN yeh ladee jaati haiN
jaanta koyee nahiN iski haqeeqat kya hai

jab zameeN ki koyee qeemat hi nahiN aalam meiN
tira rutbah hai kya aur teri yeh daulat kya hai

saaray 'aalam ka jo naazim hai wohee batlaaye
yeh zameeN kya hai zameeN waaloN ki qeemat kya hai

is zameeN meiN haiN chupay 'arsh kay rehnay waalay
aao us noor say poocheN keh yeh jannat kya hai

maaN kay qadmoN meiN hai jannat yeh mohammed(s) nay kahaa
"aaj mujhper yeh khulaa raaz keh jannat kya hai"

apnay maaN baap ki khidmat jo karogay haamid
tumko dikhlaayega rab asl meiN jannat kya hai

nateejaye fikr
haamidbaaqari
al hamdulillah





AALAM:UNIVERSE
NAAZIM:GOD
NOOR:PROPHET MOHAMMED(S)
ARSH:EMPHYRIAN(THRONE OF GOD)