Anmol wrote:

Khwaab

chalo tum bhi zara ye khwaab dekho
zara si der tum ye farz kar lo

har ik insaan koshish kar raha hai
woh phir jeene ki khwahish kar raha hai
koi ab bhook se marta nahiiN hai
koi ab zulm se darta nahiiN hai
sabhi ke sar pe chhat hai, aasra hai
yahaaN har aadmii kaa tan Dhakaa hai

chalo tum bhi zara ye khwaab dekho
zara si der tum ye farz kar lo

kaheen aaNsoo, kaheeN maatam nahiiN hai
GhamoN ka ab koi mausam nahiiN hai
Ghareebi kaa nahiiN ehsaas baaqi
hai ab tak sab diloN meiN aas baaqi
kabhi to ham ko bhi khushyaaN mileN gi
hamaari raah meiN kaliyaaN khileN gi

chalo tum bhi zara ye khwaab dekho
zara si der tum ye farz kar lo

na raNg-o-nasl par jhagRe ga koii
na deen aur dharm par akRe ga koii
uThaayeNge na ab hathyaar hargiz
na kum hoga jahaaN se pyaar hargiz
yahaaN sab chain se, mil kar raheN ge
chaman meiN phool ab khil kar raheN ge

chalo tum bhi zara ye khwaab dekho
zara si der tum ye farz kar lo

by, Ayesha :Anmol:

jawaid badauni wrote:
Bohat Khub Anmol SaHibah. Sub kuch jo aaj ho raha hai aur nahiN hona chaahiye aap ne Khuwaab ki shakl meN bayan kar diya. mujhe yeh andaaz bohat pasaNd aaya.

Aap bus yeh nah faramoh kijiyega keh" "Khuwaab sharminda-e tAbeer kahaN hote haiN...Taj har maut pe tAmeer kahaN hote haiN.''

Is Nazm (ya agar isey geet kaha jaye) per meri daad qubool farmaaiye.

MukhliS

Jawaid

m.naeem.sameer wrote:Anmol SaaHibah.
aadaab.

MASHA ALLAH Khoob naZm kahi hai aap nay, aur hum sub apkay is Khvaab kii taAbeer kay liye dua go raheNgay.

bahat ach~chi naZm per naa cheez kii daad aur mubarakbaad HaaZir hai, aaindha bhi apnay kalaam say nawaaztay rahiye gaa.


SAMEER

Aashufta wrote: Anmol SaaHebah aadaab:

ek a'rSah ke b'ad aap se hamkalaamee ka moq'a mil rahaa hai.
is nazm ka andaaz aap ke maKhSooS andaaz se zaraa haT kar hai.
Kher nazm achchee lagee daad qubool farmaaeN

Ghareebi kaa nahiiN ehsaas baaqi
hai ab tak sab diloN meiN aas baaqi

she'r yeh bhee achchaa hai. lekin dosare miSr'ae tavajjuh chaahtaa hai.
is kee ek Surat yeh bhee ho saktee hai

diloN meiN hai abhee tak aas baaqee

yeh Sirf meree Haqeer raaye hai aur aap ka is se muttafiq honaa hargiz zarooree naheeN.

iraadat-kesh,
Najm

Khurshidul Hasan Naiyer wrote:Muhtarma Anmol sahiba

Assalam Alaikum

Achhi nazm pa dad qubool kijye. Hona is khwaab ke mutbique chahiye tha lekin afsos ke aise haalat naheeN haiN. Muje to yeh Duaiya khwaab lagraha hai Allah kare ke aisa hojaye.

Allah Hafiz

Khurshidul Hasan Naiyer