R a m a d h a n K a r e e m


maanta hooN gunaahgaar hooN maiN

apni Ghaflat pe sharmsaar hooN maiN



har Hadeeth.e Nabi* ko bhoola tha

maiN tou Qura’an hi ko bhoola tha



lazzat-e jism.o.jaaN meN khoya tha

chaar din ke jahaN meN khoya raha



pake ta’aleem bhi raha jahil

kyuuNkeh maiN deen.e Haq se tha Ghafil



raat meN kub kabhi ibaadat ki

jab bhi ki doosroN ki Geebat ki



fikr-e daulat meN maiN raha din raat

bhoolker haj, zakat som salaat



dil meN thee sirf is jahaN ki chaah

maanta hooN ghalat thee meri raah



phir bhi Ma’bood tera bundah hooN

FaKhr se tera kalma paRhta hooN



dil se maiN Ahmadee tou huuN Ya Rub

jaN niSaar.e Nabee* tou huuN ya Rub



koyee tujhse se baRa raheem nahiN

aur tujh sa koyee kareem nahiN



laGzishoN ka sila na de Ma’bood

mujh ko koye saza nah de Ma’bood



yeh jo Ramdhan ka maheenah hai

yeh tou rahmat ka ik Khazeenah hai



ai Khuda mujh ko Haq ki raah dikha

waastah tujh ko rooh.e Ahmad* ka



raghbat.e dahr se riha kar de

maaiil.e deen.e Mustafa* kar de



Apne a’amal per nah sharm aaye

Zindagee merii aisee ho jaaye



Tere mehboob ka moHib bun jaaooN

Aur maddaaH.e Mustafa* kahlaaooN



Mujh ko umr.e daraz bhee de de

Shauq.e roza namaz bhi de de



maiN rahooN mominoN ki SoHbat meN

raat guzre miree I’baadat meN



Sadqaa-e a’al.e Mustafa* mil jaaye

raah.e firdaus ka pata mil jaaye

----------------------------

* SAWW


Jawaid Badauni

Muscat - Oman

Mohtaram Jawaid Badauni Saheb


Ramadhan Mubarak

Bande ka mahisiba nazm mein bohat khoobsority ke saath dhal diya hai aapne.
Allah hum sabko khataoon se door rakhe aur sahi rah dikha ye. Ameen.

raat meN kub kabhi ibaadat ki
jab bhi ki doosroN ki Geebat ki

Ibadat ke saath dekhawa ki ibaadat ka zikr hosakta tha
Geebat ko aliheda joR dete.

Meri daad aur mubarakbaad qubool kijiye.

Wassalaam
Salem Bashwar

Muzaffar Ahmad Muzaffar wrote:moHtaram Jawaid Badauni SaaHib aadaab!

Ummeed hai kheriyat se hooN ge. Aap kee yeh fikr angez naz^m dekhee jo taqwiyat-e-eemaan kaa baai'c huee. ise dekh kar maiN kaafi der isee sooch meN Dooba meN Dooba raha keh yeh Z^arooree hai keh insaan khud apnaa muHaaSibah kare aor apnee iSlaH kee jaanib tawajjah kare warnah khuda ne to banee Aadam ko mukammal Dheeyl de rakhee hai. khaer aor shar donooN t^arH ke umoor ke liye woh khudmukhtaar hai. use ikhteyaar hai keh woh kaon saa rastah ikhteyaar kartaa hai. lekin use chahiye keh woh hardam raoz-e-esaab ko zehen meN rakhe aor khudaa se Dare ke us kaa laThee be aawaaz hai.

is naz^m par meree jaanib se mubaral baad qubool keejiye Allah subhanahu ta'alaa aap ko jazaa-e-khaer se nawaze aameen!

Wassalam
Muzaffar A Muzaffar

a'zeezi Muzaffar SaaHab
aadaab

baRee pyaaree baat kahi hai aap ne. apni zaat ka muHaaSibah bohat zaroori hai. yeh nazm maiN ne waah-waah ke liye nahiN kahi thee.yeh tou ek aaSee ke zameer ki awwaz hai. Yeh Nazm kahte waqt Qur'an shareef ke woh alfaz mere zahn meN mahfooz thEy jo kuch is Tarah hai shayad: "qasam Asr ki insaan Khasary meN hai..................".

aap ne Nazm paRhi aur mujhe mubarakbad bhi dee. Bohat bohat shukriya. Khush raheN!

MuKhliS

Jawaid

sbashwar wrote:Mohtaram Jawaid Badauni Saheb


Ramadhan Mubarak

Bande ka mahisiba nazm mein bohat khoobsority ke saath dhal diya hai aapne.
Allah hum sabko khataoon se door rakhe aur sahi rah dikha ye. Ameen.

raat meN kub kabhi ibaadat ki
jab bhi ki doosroN ki Geebat ki

Ibadat ke saath dekhawa ki ibaadat ka zikr hosakta tha
Geebat ko aliheda joR dete.

Meri daad aur mubarakbaad qubool kijiye.

Wassalaam
Salem Bashwar

moHtarmee Bashwar Saahab
aadaab

Bahut bahut shukriya. Aaap ka mashwara pasand aaya. is per Gaur karooNga.

Yeh Nazm kya thee mere dil ki awwaz thee jis ko sunker aap ne mujh per eHsaan kiya hai. ek baar phir shukriya.

Wassalaam
Jawaid

Khurshidul Hasan Naiyer wrote:muHtaram Jawaid Badauni Sb

Assalaam a'laikum

ek baNde kee faryaad apne Khaliq se. bahut pasaNd aaee. Jb Muzaffar Sb ne Theek likha hai keh imaan tazah hogayaa. Allah SWT ham sab ke dil ko narm farmaae or apnaa khaaS faz^l farmae.

daad or mubaarak baad pesh hai qubool farmaaeN. Ramz^aan kee amad peh mubarak baad or dua'aa kee bhee darkhaSt hai.

aHqar

Khurshidul Hasan Naiyer.

MoHtaramee Naiyer SaaHab
aadaab

behud mamnoon hooN aap ka. waise yeh Nazm wah wah ke liye nahiN thee. yeh ek aaSee.o.KhaTakaar ke zameer ki aawaaz hai. agar mere kisee she'r ka kisee ek wahid dil per bhee aSar ho jaye jo maiN Khud ko bahut kaamyaab taSawwoor karooNga.

MuKhliS
Jawaid