• naZ'm "banjaaraa"_________________"NaZ'eer"

Posted: **Mon Apr 13, 2009 7:02 am**

HaaZireen maHfil !
assalaamoa'laikum

ustaad-e-man MuHtaram Sarwar SaaHib ki farmaaish peh "NaZ'eer Akbar Aabaadee" ki yeh bai.naZ'eer naZ'm paish kar rahaa hooN - is naZ'm ko alfaaZ' ki rau maiN bahnay ki bajaa.ay ruk ruk kar Thahar Thahar kar baGhaur paRhnay ki Zaroorat hay kyaa a'jab hay keh yooN "dhokay ke ghar" se jee uchaaT ho aur fikr-e-aakhirat ke baab maiN kuCh justjoo ho aur kuCh a'jab naheeN keh maiN aap ko du'aaoN maiN yaad aa jaa.ooN aur mairaa kaam ban jaa.ay "andhay ko aNdhairay maiN baRee door ki soojhee" -khair ,ziyaadah mukhil naheeN bantaa- leejiye mulaaHiZ'ah farmaaiye :

banjaaraa

Tuk HirS-o-hawaa ko ChauR miyaaN mat dais badais Phiray maaraa
qazzaaq ajal kaa looTay hay din raat bajaa kar naqqaraa
kyaa badhiyaa bhaiNsaa bail shutar kyaa goee pillaa sar bhaaraa
kyaa gaihooN chaaNwal mooTh maTar kyaa aag dhuwaaN kyaa aNgaaraa

sab ThaaTh paRaa rah jaaway gaa jab laad chalay gaa banjaaraa

gar too hay laKhKhee banjaarah aur Khaip bhee tairee bhaaree hay
ai Ghaafil tujh se bhee chaRhtaa aik aur baRaa byopaaree hay
kyaa shakkar miSree qandgaree kyaa saaNbhar meeThaa Khaaree hay
kyaa daaKh munaqqaa sooNTh mirach kyaa kaisar lauNg supaaree hay

sab ThaaTh paRaa rah jaaway gaa jab laad chalay gaa banjaaraa

yeh badhiyaa laaday bail bharay jo poorab paChChim jaaway gaa
yaa sood baRhaa kar laaway gaa yaa TooTaa ghaaTaa paaway gaa
qazzaaq ajal kaa rastay maiN jab bhaalaa maar giraaway gaa
dhan daulat naatee pautaa kyaa ik kunbaa kaam nah aaway gaa

sab ThaaTh paRaa rah jaaway gaa jab laad chalay gaa banjaaraa

har manzil maiN ab saath tiray yeh jeenaa Dairaa DaaNDaa hay
zar daam daram kaa bhaaNDaa hay bandooq sipar aur KhaaNDaa hay
jab naayak badan kaa nikal gayaa jo mulkoN mulkoN baaNDaa hay
Phir haaNDa hay nah bhaaNDaa hay nah Halwaa hay nah maaNDaa hay

sab ThaaTh paRaa rah jaaway gaa jab laad chalay gaa banjaaraa

jab chaltay chaltay rastay maiN yeh goon tiree Dhal jaaway gee
ik badhiyaa tairee maTee par Phir ghaas nah charnay aaway gee
yeh Khaip jo too ne laadee hay sab HiSSoN maiN baT jaaway gee
dhee put janwaaee baiTaa kyaa banjaaran paas nah aaway gee

sab ThaaTh paRaa rah jaaway gaa jab laad chalay gaa banjaaraa

yeh Khaip bharay jo jaataa hay yeh Khaip miyaaN mat gin apnee
ab koi ghaRee pal saa.'at maiN yeh Khaip badan ki hay Khapnee
kyaa thaal kaTauray chaandee ke kyaa peetal ki Dabiyaa dhapnee
kyaa bartan saunay roopay kay kyaa maTTee ki hanDyaa chapnee

sab ThaaTh paRaa rah jaaway gaa jab laad chalay gaa banjaaraa

kuCh kaam nah aaway gaa tairay yeh la'l zamurrud seem-o-zar
jab pooNjee baat maiN biKhray gee Phir aan banay gee jaan oopar
naqqaaray naubat baan nishaaN daulat Hashmat faujaiN lashkar
kyaa masnad takiyah mulk makaaN kyaa chaukee kursee takht Chappar

sab ThaaTh paRaa rah jaaway gaa jab laad chalay gaa banjaaraa

kyaa jee par baujh uThaataa hay in goonoN bhaaree bhaaree ke
jab maut kaa Dairaa aan paRaa Phir doonay haiN byopaaree ke
kyaa saaz jaRaao zar zaiwar kyaa gauTay thaan kinaaree ke
kyaa ghoRay zain sunahree ke kyaa haathee laa a'mmaaree ke

sab ThaaTh paRaa rah jaaway gaa jab laad chalay gaa banjaaraa

maghroor nah ho talwaaroN par mat bhool bharosay DhaaloN ke
sab paTTaa tauR ke bhaagaiN gay muNh daiKh ajal ke bhaaloN ke
kyaa Dabbay mautee heeroN ke kyaa Dhair khazaanay maaloN ke
kyaa baqchay taash mushajjar ke kyaa takht shaal do.shaaloN ke

sab ThaaTh paRaa rah jaaway gaa jab laad chalay gaa banjaaraa

kyaa sakht makaaN banwaataa hay Kham tere tan kaa hay polaa
too ooNchay kauT uThaataa hay waaN gaur gaRhay ne muNh Kholaa
kyaa apnee khandaq rand baRay kyaa burj kaNgooraa anmolaa
gaRH kauT rahiklah taup qil'ah kyaa sheeshah daaroo aur golaa

sab ThaaTh paRaa rah jaaway gaa jab laad chalay gaa banjaaraa

har aan nafa' aur TooTay maiN kyaa martaa Phirtaa hay ban ban
Tuk Ghaafil dil maiN soch zaraa hay saath lagaa tairay dushman
kyaa lauNDee baaNdee daa.ee dawaa kyaa bandah cheelaa naik chalan
kyaa mandir masjid taal kuNwaiN kyaa ghaaT.saraa kyaa baaGh chaman

sab ThaaTh paRaa rah jaaway gaa jab laad chalay gaa banjaaraa

jab marg Phiraa kar chaabuk ko yeh bail badan kaa haaNkay gaa
koi taaj samaiTay gaa tairaa koi goon siye aur TaaNkay gaa
ho Dhair akailaa jangal maiN too khaak laHad ki PhaaNkay gaa
is jangal maiN Phir aah "NaZ'eer" ik bhungaa aan nah jhaaNkay gaa

sab ThaaTh paRaa rah jaaway gaa jab laad chalay gaa banjaaraa

===============================================================

Posted: **Tue Apr 14, 2009 5:51 am**

Mohtaram Yasir Shah Saheb

Nazeer Akbar Aabaadee saheb ki bohat hi umda nazm aapne pesh ki hai. Agar iska rasm-al-khat urdu hota tu aur lutf aajata.
Shukria

Posted: **Wed Apr 15, 2009 5:00 am**

sbashwar wrote:Mohtaram Yasir Shah Saheb

Nazeer Akbar Aabaadee saheb ki bohat hi umda nazm aapne pesh ki hai. Agar iska rasm-al-khat urdu hota tu aur lutf aajata.
Shukria

muHtaram Saleem Bashwar SaaHib!
assalaamoa'laikum

aap ne mairaa intikaab pasand kiyaa, 'ain nawaazish -urdu rasmul khat' ki saHoolat mujhay mayassar naheeN aur Phir kaheeN se yeh mil bhee jaa.ay to is kaa "type" , "t'areeqah-e-paishkash" aur "qillat-e- waqt" teen alag masaail haiN -is naZm maIn karnay kaa aur bahut kaam thaa jaisay talaffuzaat ki taHqeeq, lafZ'oN ke mu'aanee kaa indiraaj magar

hastee apnee Hubaab ki see hay
yeh numaaish saraab ki see hay

muHtaaj-e-du'aa
yasir

naZ'm "banjaaraa"_________________"NaZ'eer"

naZ'm "banjaaraa"_________________"NaZ'eer"

Re: naZ'm "banjaaraa"_________________"NaZ'eer"

Re: naZ'm "banjaaraa"_________________"NaZ'eer"