• jo aag lagaataa phirtaa ho, vo aag bujhaanaa kia jaane!

Posted: **Thu Mar 10, 2005 2:09 am**

salaam dosto,

aapkii Khidmat meN ek Ghazal pesh karne kii jasaarat kar rahaa huuN is ummeed e qawii par ki aapkii tab'a e naazuk par baar e giraaN na guzregii. aapkii aaraa ka shiddat se intezaar rahegaa. shukria.

to, Ghazal mulaaHizah farmaaiye:

1.
zaalim hai jafa_kun! kam_sin hai!! vo dil kaa lagaanaa kia jaane!!!
kia dil pe guzartii hai mere, be_dard zamaana kia jaane!

2.
mastaana adaa se, chitvan se, aaNkhoN ke sitam_gar sho'loN se
jo aag lagaataa phirtaa ho, vo aag bujhaanaa kia jaane!

3.
gulshan ke mahekte phooloN meN qismat ho phalii phooli jiskii
Takraa ke moqaddar patthar se, vo ranj uThaanaa kia jaane!

4.
jo Khoon-e-jigar ko pee pee kar ma'shooq pe jal jal martaa ho
vo Husn ka shaidaa parvaanaa, auroN ko miTaanaa kia jaane!

5.
har ek ishaare par jiske qurbaan hoN laakhoN parvaane
be-dard vo, "Sai'hbaa Ji!" terii taqdeer banaanaa kia jaane!

Posted: **Tue Mar 15, 2005 4:39 am**

Hashmat saHib:

salaam arz hai

aap ki ye ghazal pehle bhi paRhi thi, magar bar.vaqt daad na de sakaa :P

ghazal bahot achi hai, meri jaanib se daad qubool kijiye :)

shukria

amjad

Posted: **Tue Mar 15, 2005 2:43 pm**

mohtaram Hashmat saheb

aadaab o tasleemaat
aap ki ghazal bohat pasand aaee har sher lajawaab he meri janib se daad hazir he

husaini