• Ek Ghazal

Posted: **Tue Apr 06, 2010 8:32 pm**

Ghazal

woh jo tere dam se thaa ab mere Khirman meN naheeN
zaKhm-e-dil, chaak-e-girebaaN, daaGh-e-daaman meN naheeN

gardish-e-dauraaN kee dekho to karam-farmaa,iyaaN
dost meN jo baat hai wallaah! dushman meN naheeN!

kis qadar be-lut^f hooN nairaNg-e-hastee dekh kar
raNg woh gul meN naheeN, Khushboo woh gulshan meN naheeN

ro,iYe taqdeer ko kyaa jab naheeN kuchh iKhtiyaar
yeh huwaa ma'loom HaaSil kuchh bhee shewan meN naheeN

she'r to woh hai keh jo ho naazish-e-ahl-e-suKhan
:aabroo kyaa Khaak us gul kee jo gulshan meN naheeN:

shaam-e-hijraaN, shab-gazeedah SubH, roz-e-aarzoo
kaun see ne'mat miree qismat ke aaNgan meN naheeN?

ahl-e-dil kyaa uTh gaYe bazm-e-Khirad se dosto?
ab woh pehlee see Z^iyaa kyoN shama'-e-raushan meN naheeN?

qaafiyah hai taNg "Sarwar" is zameen-e-she'r meN
lut^f she'r-o-shaa,i'ree kaa kaawish-e-fan meN naheeN