• Kalam-e- Azim Rahi !!!!!!!

Posted: **Tue Nov 09, 2010 9:31 am**

EID KI PESHGI MUBARAK BAAD !!
(NAZM)

In Tarraqtay Naheef Kaan'dhon Per,
Apnay Kumbay Ka Bojh Dhota Hun,
Aur Jab Dil Ka Bojh Barhta Hai,
Biwi, Bach'chon' Say Chup K Rota Hun,
Zabt-e-Gham Ki Nahin Koi Me'aad,
Eid Ki Peshgi Mubarak Baad !

Bujhti Aankhain, Suta Hua Chehra,
Yehi Anjaam-e-Sakht Koshi Hai,
Jorta Hun Raqam Kafan K Leay,
Yehi Asl-e-Safaid Poshi Hai,
Her Tag-o-Do Ki Hai Yehi Bunyaad,
Eid Ki Peshgi Mubarak Baad !

Seetiaan' Baj Rahi Hain Kaanon' Mein,
Siskioon' Aur Thandi Aahon' Say,
Eid Ka Chand Kia Nazar Aaey,
Dab-dabaati Hui Nigahon' Say,
Arz Be-nutq, Be-sada Irshaad,
Eid Ki Peshgi Mubarak Baad !

Keh Rahi Hai Zaban-e-Haal Miri,
Main Nay Ki Hai Tarraqi-e-Ma'koos,
Roz Chupta Hun Qarz Khahon' Say,
Kaisay Banwaoon' Khush-numa Malboos,
Her Zaroorat Hai Baanjh, Be-ejaad,
Eid Ki Peshgi Mubarak Baad !

Thak Gaya Hai Mira Rafugar Bhi,
Yun Udharta Hai Chaak Sil Sil Ker,
Kehtay Hain Eid Hans K Miltay Hain,
Main Agar Ro Para Galay Mil Ker,
Mujh Ko Is Rasm Say Rakkho Aazaad,
Eid Ki Peshgi Mubarak Baad !

Aik Patthar Hai Meray Seenay Mein,
Ya Dil-e-Na'saboor Rakhta Hun,
Eid Per Khush Libaas Bach'chon' Say,
Apnay Bach'chon' Ko Door Rakhta Hun,
Aap Hi Said Aap Hi Sayyaad,
Eid Ki Peshgi Mubarak Baad !

Eid K Din Kahin Nikaltay Nahin,
Main, Miri Ahlia, Miri Aulaad,
Is Leay Doston Ki Khidmat Mein,
Eid Ki Peshgi Mubarak Baad !

Khush Rahain Sab Ba-qadr-e-Iste'daad,
Eid Ki Peshgi Mubarak Baad !!

Azim Rahi

Posted: **Tue Nov 09, 2010 10:21 am**

Aapki nazm bohat achchi hai.
Allah sabko eid pur massarrat bana de. ameen.

Posted: **Tue Nov 09, 2010 7:07 pm**

Toota To Ye Khula Hai K Ik Aainaa Tha Main,
Kia Soch Ker Chataan Ki Soorat Khara Tha Main !

Deewar-e-Zeest Per Kisi Tasveer Ki Tarha,
Her Ahd-e-Khamshi Mein Sajaya Gaya Tha Main !

Yunhi Nahin Hai Dasht-Nawardi Ka Silsila,
Bachpan Mein Nangay Pau'n Bohat Bhagta Tha Main !

Aankhon Mein Aa-gaeen Theen Bala Ki Sama'atain,
Khamosh Tha Wo Shaks Magar Sun Raha Tha Main !

Teray Labon Ki Aanch Nay Jisko Jaga Dia,
Us Jazba-e-Lateef Say Na-Aashna Tha Main !

Zoq-e-Namood, Jor-e-Khizan' Say Na Kam Hua,
Sehn-e-Chaman Say Door Kahin Khil Raha Tha Main !

Taareekh-e-Dehr Meray Amal Per Muheet Hai,
Ik Razm-e-Khair-o-Shar Ka Ajab Majara Tha Main !

Azim Rahi

Posted: **Wed Nov 10, 2010 12:55 am**

SUBHAANALLAH , bahut khoob !
BaRa pur asar kalaam hai
Daad aur dili mubaarakbaad

Posted: **Sat Nov 13, 2010 12:01 pm**

Waqt Sab Say Bara Fusoon'-gar Tha,
Mur K Dekha To Shehr Patthar Tha !

Kuch Na Man'ga Kabhi Muqaddar Say,
Ye Bhi Shayad Mira Muqaddar Tha !

Dhoop Ki Kaj-adaiyyan' Mat Pooch,
Mera Saya Mirey Brabar Tha !

Tu Nay Kyun Mujh Ko Pyaar Say Dekha,
Main Tiri Be-rukhi Ka Khugar Tha !

Saaniha Teri Be-wafai Ka,
Meray Wehm-o-Guman' Say Bahar Tha !

Haar Janay Say Kuch Nahin Hota,
Wo Bahar-haal Mujh Say Bartar Tha !

Aalam-e-Tishnagi Na Pooch Azeem,
Aik Qatra Mujhay Samudar Tha !

Azim Rahi

Posted: **Sat Nov 13, 2010 12:03 pm**

Ik Guzartay Huay Lamhay Ki Tarah,
Hum Bhi Hotay Hain Na Honay Ki Tarah !

Apnay Ashkon Ko Chupa Rakkha Hai,
Ghar Say Bhagay Huay Bach'chay Ki Tarah !

Umr Bhar Meray Ta'aqqub Mein Raheen,
Teri Yaadain Mirey Saey Ki Tarah!

Aik Lamhay Mein Badal Jati Hai,
Meri Qismat Tirey Lehjay Ki Tarah !

Uski Aadat Hai K Milta Hai Mujhay,
Khail K Aakhri Lamhay Ki Tarah !

Shum-e-Ahsaas Pe Raqsaan' Hun Azeem,
Aik Majboor Patangay Ki Tarah !

Azim Rahi

Posted: **Sat Nov 13, 2010 12:13 pm**

Agar Dil Bhar Gaya Hai Dosti Say,
Churalo Apna Haath Aahistagi Say !

Faqat Ik Neend Main So Ker Utha Hun,
Dar-o-Deewar Hain Kyun Agnabi Say !

Mujhay Tum Apni Mehfil Say Uthado,
Ulajhta Hun Yahan Main Her Kisi Say !

Karun Kia Tazkira Mehroomion' Ka,
Bohat Hai Jo Mila Hai Zindagi Say !

Mubarak Ho Tulu-e-Subh Tum Ko,
Mujhay Dar Lag Raha Hai Roshni Say !

Wo Meer-e-Karwaan' Ab Ban Gaey Hain,
Jinhain Manzil Mili Hai Gum rhi Say !

Kisi Ki Baat Kab Sunta Hai Rahi,
Kahun Kia Main Ab Aisay Aadami Say !

Azim Rahi

Posted: **Sun Nov 14, 2010 10:02 am**

Bhool Janey Say Bhi Thak Jao Gay Kia,
Yaad Aanay Say Bhi Thak Jao Gay Kia !

Gahey Gahey Tum Khayal-o-Khaab Mein,
Aanay Janay Say Bhi Thak Jao Gay Kia !

In Labon Ki Nazuki Apni Jaga,
Muskuranay Say Bhi Thak Jao Gay Kia !

Chahtay Rehna Bohat Dushwaar Hai,
Chahay Janay Say Bhi Thak Jao Gay Kia !

Pursish-e-Ahwaal K Parday Mein Tum,
Dil Dukhanay Say Bhi Thak Jao Gay Kia !

Ban Nahin Saktay Jo Meray Hum-nawa,
Gungunanay Say Bhi Thak jao Gay Kia !

Meray Honton Say Tabassum Cheen Ker,
Ab Rulanay Say Bhi Thak Jao Gay Kia !

Thak K Rahi Rh-guzaar-e-Shoq Mein,
Beth Janay Say Bhi Thak Jao Gay Kia !

Azim Rahi

Kalam-e- Azim Rahi !!!!!!!

Kalam-e- Azim Rahi !!!!!!!

Re: Kalam-e- Azim Rahi !!!!!!!

Re: Kalam-e- Azim Rahi !!!!!!!

Re: Kalam-e- Azim Rahi !!!!!!!

Re: Kalam-e- Azim Rahi !!!!!!!

Re: Kalam-e- Azim Rahi !!!!!!!

Re: Kalam-e- Azim Rahi !!!!!!!

Kalam-e- Azim Rahi !!!!!!!