urdujahaaN ke 18veN mushaaEre meN Khayaal kee kaavish baad az aadaab o tasleemaat ke urdubandhan kee nazr
arz e Khidmat hai

baat mujh se karte ho jab tum ishaaroN kee taraH
aaNkhoN se shauKhee jhalaktee hai nazaaroN kee taraH

zingadee jeene kaa aise aane lagtaa hai mazaa
phool jaise khil uTheN har soo bahaaroN kee taraH

aasteenoN meN chhupe haiN kitne saare saaNp jo
bholee Soorat ko liye milte haiN yaaroN kee taraH

maahee e be aab ban kar dil taRaptaa hai miraa
choR kar jaate ho jab tum be sahaaroN kee taraH

pyaar ke lafzoN meN meeThe zehr meN Doobaa lahoo
dauRtaa hai abb ragoN meN bhee sharaaroN kee taraH

apnee sachchaa'ee kaa mere paas hai yeh hee Cuboot
" ashk palkoN peh chamakte haiN sitaaroN kee taraH "

be murawwat zindagee ke roop haiN kaise "Khayaal"
dostoN meN dooriyaaN be aitbaaroN kee taraH

Ismail Ajaz Khayaal

MoHtaram Ismail Ajaz Saheb


Aapki ghazal ka har sheir qabl-e-daad hai. Sheir # 3 haqeeqat par mabni hai.
Meri daad aur mubarakbaad qubool farmayeN.

Mukhlis
Salem Bashwar

sbashwar wrote:MoHtaram Ismail Ajaz Saheb


Aapki ghazal ka har sheir qabl-e-daad hai. Sheir # 3 haqeeqat par mabni hai.
Meri daad aur mubarakbaad qubool farmayeN.

Mukhlis
Salem Bashwar

moHtaram janaab Salem Bashwar SaaHeb

aap kee HauSlah afzaa'ee o pazeeraa'ee mere liye baa'iC e aizaar o iftiKhaar hai,Allah aap ko duniyaa o aaKhirat kee izzateN ataa farmaa'ey

apne duaa'oN meN yaad rakhiye

niyaazmand

Ismail Ajaz Khayaal