ek taazah kalaam ke saath Khayaal kaa aadaab yaaraan e bazm kee Khidmat meN

arz kiyaa hai

agar dunyaa meN ulfat hee tumhaaraa kaam ho jaa'ey
tow samjho zindagee insaaniyat ke naam ho jaa'ey

guloN kee bazm meN Khushboo se jis ne bhee muHabbat kee
woh har jaanib hee maiHfil meN ruKh e gulfaam ho jaa'ey

nah tarsaaow humeN itnaa kaheeN aisaa nah ho abb ke
bahaaroN se sajee rut ka KhizaaN anjaam ho jaa'ey

muHabbat meN kisee ko istaraH chaahaa naheeN karte
keh saare shaihr meN ulfat bhee Khud badnaam ho jaa'ey

tumhaaree raah meN har roz maiN palkeN bichaataa hooN
bass iss umeed par nazar e karam in'Aam ho jaa'ey

khule rakhtaa hooN ghar ke sab dareeche iss liye har pal
keh shaayad pyaar kee purwaa kaa faiz e aam ho jaa'ey

kahaaN ho tum chale aaow keh tum bin dil naheeN lagtaa
" tumhaare naam kee ikk KhoobSoorat shaam ho jaa'ey "

"Khayaal" aaow keh mil jul kar bitaa'eN zindagee apnee
muHabbat pyaar kaa har soo yehee paiGhaam ho jaa'ey

Ismail Ajaz Khayaal

"bas is ummid par nazar e karam ina'aam ho jaye"... kya kahne Khayal bhai... Mubarak baad pesh karta huN.. Agar zahmat na ho to laal rang ke bajaye koi aur rang aankhouN ke liye farhat bakhsh Cabit ho sakta ho.... Allah aap ko shad o abaad rakhhe...

Bohat khoob.

azeezbelgaumi wrote:
"bas is ummid par nazar e karam ina'aam ho jaye"... kya kahne Khayal bhai... Mubarak baad pesh karta huN.. Agar zahmat na ho to laal rang ke bajaye koi aur rang aankhouN ke liye farhat bakhsh Cabit ho sakta ho.... Allah aap ko shad o abaad rakhhe...

janaab moHtaram azeezbelgaumi SaaHeb

salaam qubool farmaa'iye ,aap kee daad sar aaNkhoN par ,aap kaa mashwarah bajaa hai maiN insha Allah aa'indah iss baat kaa Khayaal rakkhooN gaa

ek baar phir aap kaa beHad shukriyah

mamnoon

Nayeem Khan wrote:Bohat khoob.

janaab moHtaram Nayeen Khan SaaHeb

salaam aap kee Khidmat meN

aap kee waalidah maajidah kee Khabar paRhee thee waqt par Haazir nah hoskaa mu'aafee kaa talabgaar hooN ,Allah paak unheN apne jawaar e raHmat meN aalaa muqaam ataa farmaa'ey unkee maGhfirat farmaa'ey

aap kee nazar inaayat ke liye sipaas guzaar hooN

niyaazmaNd