mohatram A.Nazir sahib
aapka kalaam phir aapka kalaam hai, jis mai hameiN kia kalaam ho sakta hai.:) saada laikin bauhut dilchasp aur khoobsurat ghazal irshaad farmai hai aapne , behad pasand ai.
shukriaM.Q

1)AasmaaN per mujhe ay chaand bulaataa kiyuN hei
Mujh se naalaaN hei tou phir sir pah biThaataa kiyuN hei

3)Chaahne waale ke dil meiN hei Thikaanah teraa
usi kaAbeh ke dar o baam giraataa kiyuN hei

5) Bhool jaanaa hei agar waAdah o paimaaN apne
meri her baat mujhe yaad dilaataa kiyuN hei

7)Shookhiy-e-chashm se ghaafil nahiN rehtaa Nazir
Jaane too apni tamanna ko chupaataa kiyuN hei.

Wahh kya kehne..bahut khoob..ek alag andaaz ..tewer liye aur saadgi se bharpoor ghazal pesh karne ka bahut shukriya Nazir bhai..daad hazzir hai :)


Talib-e-duaa,
Shumaila

WEBMASTER wrote: 1)AasmaaN per mujhe ay chaand bulaataa kiyuN hei
Mujh se naalaaN hei tou phir sir pah biThaataa kiyuN hei

2)Shaam-e-hijraaN mujhe jooN shamA jalaataa kiyuN hei
gham ke maare houe insaaN kou sataataa kiyuN hei

3)Chaahne waale ke dil meiN hei Thikaanah teraa
usi kaAbeh ke dar o baam giraataa kiyuN hei

4)Aankh meiN taab kahaN hei tiraa jalvah dekhe
apne deewane kou deevaanah banaataa kiyuN hei

5) Bhool jaanaa hei agar waAdah o paimaaN apne
meri her baat mujhe yaad dilaataa kiyuN hei

6) Jam gayaa thaa jo miraa khoon-e-jigar baih baih kar
phool kehkar use baalaoN mein sajaataa kiyuN hei

7)Shookhiy-e-chashm se ghaafil nahiN rehtaa Nazir
Jaane too apni tamanna ko chupaataa kiyuN hei.

Mautarum Nazir SaaHeb:

Aadaab-o-tasleemat,,

Mukhtasar waqt mein aap kee yeh saadha ghazal bauth khoob hai. :)

Aur ek mash'oor ghazal jo isse zameen per hai yaad aa gai:

Aankh se aankh miLaa baat banaata kiyon hai
tu agar mujh se khafa hai tu chipataa kiyon hai


Ek khoobsoorat kalam takhleeq karNe per daad qubooL keejiye.
Wassalam

Zahida Raees :Raji:

muHtaramee Nazir SaaHeb: aadaab!

aap kee yeh dilpazeer Ghazal naz^ar-nawaaz huyee. is kee bandisheN aur rawaanee donoN hee dilkash haiN aur har she'r is miSre' kee ta'beer ma'loom hotaa hai:

karishmah daaman-e-dil mee kashad keh jaa eeN jaa,st!

meree naacheez daad qubool keejiYe, aur do-ek baateN a'rZ^ karne kee ijaazat deejiYe. in sut^oor kaa maqSad apnaa Zehnee it^meenaan hai. tanqeed kaa koyee sawaal naheeN hai. ummeed hai keh aap is teHreer ko isee pas-manz^ar meN dekh`eN ge aur mere iltibaasaat door farmaa kar shukriyah kaa mauqa' a't^aa kareN ge.

agar maiN Ghalat^ee par naheeN hooN to yeh Ghazal-e-musalsal hai. sawaal yeh hai keh har she'r meN aap kaa muKhaat^ib kaun hai? mat^le' ko naz^ar-andaaz kar deN to meHboob ko aap kaa muKhaat^ib samajh`ne meN koyee qabaaHat naheeN hai. lekin aap ne mat'le` meN :ai chaaNd!: keh kar har she'r ko is Khit^aab kaa paaband kar diyaa hai aur is se asha'ar meN iltibaasaat aur shubhaat paidaa ho gaYe haiN. is ijmaal kee th`oRee see tafSeel darj-e-Zel hai:
---------------
AasmaaN per mujhe ay chaand bulaataa kiyuN hei
Mujh se naalaaN hei tou phir sir pah biThaataa kiyuN hei

:aasmaan par chaaNd kaa aap ko bulaanaa aur ph`ir sar peh biThaanaa: dilkash baateN to haiN lekin in se aap kaa mat^lab kyaa hai? yeh :chaaNd: kaun hai? aasmaan waalaa :chaaNd: to z^aahir hai keh aap se :naalaaN: kisee Soorat se naheeN ho saktaa hai. is t^araH to pooraa she'r hee mubham aur mu,a'mmah ho kar reh jaataa hai. agar :chaaNd: se aap kee muraad :meHboob: hai to meHboob aap se :naalaaN: yaqeena" ho saktaa hai aur is mafrooZ^ah kaa jawaaz doosre asha'ar meN bh`ee mil saktaa hai. lekin ph`ir us kaa aap ko :aasmaan par bulaa kar sar peh biThaanaa: jawaab-t^alab ho jaataa hai. tashreeH kar deN to i'naayat ho gee aur she'r ke muZ^miraat samajh`ne meN aasaanee ho jaaYe gee.
----------------------
Shaam-e-hijraaN mujhe jooN shamA jalaataa kiyuN hei
gham ke maare houe insaaN kou sataataa kiyuN hei

Chaahne waale ke dil meiN hei Thikaanah teraa
usi kaAbeh ke dar o baam giraataa kiyuN hei
----------------------------
Aankh meiN taab kahaN hei tiraa jalvah dekhe
apne deewane kou deevaanah banaataa kiyuN hei

doosre miSre' meN ba-z^aahir :apne deewaane: se muraad : woh jo teree muHabbat se sarshaar hai: hai, aur us ko :deevaanh banaane: se muraad us ko :hosh-o-hawaas se begaanah kar denaa: hai. yeh Soorat-garee bohat dilkash hai. ek sawaal Zehn meN aataa hai keh meHboob ko aaNkhoN se dekh`ne se aap par yeh kaifiyyat kyoN t^aare hogee jab.k aap ne muHabbat us z^aalim ko dekh`ne ke ba'd hee to kee ho gee!
-----------------------
Bhool jaanaa hei agar waAdah o paimaaN apne
meri her baat mujhe yaad dilaataa kiyuN hei

meraa Khayaal hai keh :jaanaa: kee bajaaYe :jaataa: ho gaa aur yeh ek :typo: hai warnah to pehlaa miSra' be-ma'nee ho jaataa hai.
-------------------------------
Jam gayaa thaa jo miraa khoon-e-jigar baih baih kar
phool kehkar use baalaoN mein sajaataa kiyuN hei

Shookhiy-e-chashm se ghaafil nahiN rehtaa Nazir
Jaane too apni tamanna ko chupaataa kiyuN hei.
--------------------------
ummeed hai keh koyee baat aap ko giraaN naheeN guzree ho gee. aap kee waZ^aaHat kaa muntaz^ir rahooN gaa. shukriyah!

Sarwar A. Raz :Sarwar:

Muhtarami
SARWAR A. RAZ. :SARWAR: sAAHIB


Purkhuloos Tasleemaat o Ihtiram, :)


Bachpan meiN aik ustaad ne faarsi ka aik misraA paRhaa aur mujh se sawaal kiyaa keh maiN us misreA meiN kyaa khaas kaifiyat paasakaa. Wo misraA yooN thaa:

"Shakar bataraazooye vuzaarat barkash"

Jab maiN Aajiz aagayaa to aik aur misraA urdu meiN paRhaa. "Naadaan ko ulTaa bhii tou naadan rahaa". Is per maiN ne kahaa ke lafz "nadaan"
kii tarteeb-e-Aksii ko dekheN tou wo phir bhii "nadaan" hii rehtaa hei. Is ke baavajood maiN Farsi sheAr meiN aisaa koiee lafz na samajh sakaa tou ustaad ne samjhaayaa ke is misreA ke huroof ko aakhir se avval tak likhte jaayeN tou vohi ibaarat baaqi rehti hei.

Meri ghazal ke baare meiN aapka tashreeH Talab karnaa meri dukhti rag per haath rakhne ke baraabar hei. Aisi hii aik haalat ke baare meiN aik Arabi ke shaayer ne kahaa thaa "wa fassar al maa'a b'Ad al Jahde bil'maa'yi" yani jab yeh sawaal kiyaa gayaa ke lafz paani kii tashreeH kare tou javab dene waale kii saari tafseel kaa nateejah thaa "paani".

Agar aap khud meri bajaaye tafseeli tashreeh karenge tou maiN khaaskar urdubanhan per yeh misraA paRhne per majboor houjaaoonga "Badnaam agar hounge tou kyaa naam nah hougaa'. Urdu sites per aap se baRhkar mujhe aur kaun jaantaa hei!

Albattah aap ne jo likhkhaa hei:

(((Bhool jaanaa hei agar waAdah o paimaaN apne
meri her baat mujhe yaad dilaataa kiyuN hei

meraa Khayaal hai keh :jaanaa: kee bajaaYe :jaataa: ho gaa aur yeh ek :typo: hai warnah to pehlaa miSra' be-ma'nee ho jaataa hai. )))

Pehle misreA se meri muraad hei "Agar tuu apne waAda o paimaaN bhool jaanaa chaahtaa hei"
"meri her baat mujhe yaad dilaataa kiyooN hei"
Yani agar tuu apne wadah o paimaaN bhool jaanaa chaahtaa hei tou phir mujhe bhi apni(meri) baataiN yaad mat dilaa (bhool jaa aur bhool jaane de).

Aakhir meiN mazeed tafseeli guftagu karne se Aajiz hooN kiyooNkeh in dinaoN meri Diabetese kii beemaari joush per aayi houii hei.


Aapka Mukhlis,

Nazir.


.

mukarramee Nazir SaaHeb:aadaab!

aap kee a'laalat kaa ma'loom ho kar afsos huwaa. Allah ta,a'alaa aap ko SeHat a't^aa farmaaYe.

kaash aap meree ma'rooZ^aat ke jawaab meN apnee tashreeHaat se nawaazte to mere i'laavah aur adab-dost bh`ee faiZ^yaab hote aur alfaaz^ kee is bh`ool-bhulaiyyaaN se :aNgusht-ba-dandaaN: nah hote! apne kalaam-e-balaaGhat-nizaam kee waZ^aaHat meN aisee kaun see vajh maane' rahee! magar shaayad is kee ummeed teHSeel-e-laa-HaaSil se kam naheeN hai!

Sarwar A. Raz :Sarwar: