غزل ۔۔۔۔۔۔۔۔۔۔۔۔۔۔ اختر عثمان
Posted: Wed Feb 29, 2012 12:37 am
غزل ۔۔۔۔۔۔۔۔۔۔۔۔۔۔ اختر عثمان
استخواں سوختہ و خستہ دم ایسے تو نہ تھے
اے عزا خانہء احساس ! ہم ایسے تو نہ تھے
موج ِ خوں بھی تھی،سرشکِ ہنر آثار بھی تھا
سر ِ قرطاس یہ پہلے بہم ایسے تو نہ تھے
بُت پرستوں کے لئے بانہیں کُھلی رہتی تھیں
اُن زمانوں میں یہ دَیروحرم ایسے تو نہ تھے
شانہ کرتے ہوئے شل دست ہے مشّاطہء فن
زلف پُرکار ! ترے پیچ وخم ایسے تو نہ تھے
یہ بھی سچ ہے کہ سر ِ عشق سوا بھی نہ تھے ہم
قیس و فرھاد سے بہتر تھے ، کم ایسے تو نہ تھے
کچھ نہ کچھ بات بھی لوگوں کے لئے ہوتی تھی
جاہلی دَور کے اہل ِ قلم ایسے تو نہ تھے
تانوں پلٹوں میں گئی ہاتھ سے لَے بھی اختر
بھاوٰ ، جھپ تال ، دُرت ، چال ، سَم ، ایسے تو نہ تھے
۔ ۔ ۔ ۔ ۔
