قارئین کرام آداب عرض ہیں دو سال قبل لکھا کلام پیشِ خدمت ہے ۔ امید ہے پسند آئے گا اپنی آرا سے نوازیے
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جو لمحے حسرتوں کے قافلے لیے گزر گئے
تو پھول چاہتوں کے مرحلے لیے بکھر گئے
تھی چشمِ التفات سے گریز پا ہی زندگی
ہم اپنی الفتوں کے ولولے لیے جدھر گئے
جنہیں تھا ہم سے اختلاف ، جن کو تھیں شکایتیں
کھڑے تھے جا بجا جو مسئلے لیے کدھر گئے
خلوص پیار سے بھی بڑھ کے ہے فریب ہر طرف
ہم اپنی دوستی کے سلسلے لیے جدھر گئے
اب آپ کی عنایتوں نوازشوں کا شکریہ
ہمارے دل سے آپ فاصلے لیے اتر گئے
اس انجمن میں کس لیے اندھیرا ہی اندھیرا ہے
اجالوں کے چراغ دل جلے لیے کدھر گئے
ہماری خامشی پہ اعتراض کرنے والے سب
ہماری زندگی کے غلغلے لیے گزر گئے
نبھا سکے نہ تم خیالؔ دوستی کسی سے جب
تو نفرتوں کے پست حوصلے لیے ، بپھر گئے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ