دے رہا ہے مجھے پیغام شکیبائی کا
Posted: Wed Aug 12, 2020 9:26 am
قارئین کرام آداب عرض ہیں ، ایک آٹھ سال قبل لکھا کلام پیشِ خدمت ہے امید ہے پسند آئے گا اپنی آرا سے نوازیے
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔۔۔
دے رہا ہے مجھے پیغام شکیبائی کا
نام الفت میں دیا جس نے ہے سودائی کا
میرے دشمن تجھے مل جائے جہاں میں عزّت
تُو منا جشن خوشی سے مری رسوائی کا
تجھ کواب اچھے برے کی نہیں پہچان رہی
سلسلہ جوڑ کوئی فہم سے دانائی کا
اپنے چہرے کے تجھے عیب نظر آتے نہیں
آئینے سے ہے تقابل تری بینائی کا
رت جگے تُو نے دیے مجھ کو محبت کرکے
تیری یادوں نے دیا درد ہے تنہائی کا
آج بھی سنتا ہوں میں تیری صدائیں دل سے
جیسے نغمہ ہو کسی ساز میں شہنائی کا
ایک ہلچل سی مچی رہتی ہے دل میں میرے
بھولتا ہی نہیں منظر تری انگڑائی کا
میں ترا نام نہ لوں گا بھری محفل میں خیالؔ
کیا کروں حشر میں ڈر ہے تری رسوائی کا
۔۔۔۔۔۔۔۔۔۔۔۔۔۔۔۔۔۔
آپ کی محبتوں کا طلبگار
اسماعیل اعجاز خیالؔ