قارئین کرام ایک تازہ کلام کے ساتھ آداب عرض ہیں ۔ امید ہے پسند آئے گا اپنی آرا سے نوازیے شکریہ
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چلی ہے رسم زمانے میں دل لگانے کی
کرو نہ بات کسی سے وفا نبھانے کی
ہمیں گراتے ہوئے تم بھی گر گئے دیکھو
سزا ملی ہے تمہیں ہم کو یوں گرانے کی
خوشی سے آگ میں پروانہ کود جاتا ہے
لگائے شمع جو قیمت وفا نبھانے کی
ہمارا ساتھ نبھانے کا دم وہ بھرتے ہیں
کہ جن کو رستے سے عادت ہے بھاگ جانے کی
وفائیں کرتے ہوئے کوئی جاں گنوا بیٹھا
کسی نے چھوڑی نہیں شرط آزمانے کی
سبھی کی ہم ہیں خبر رکھتے ماسوا اپنے
خبر نہیں ہے ہمیں اپنے ہی ٹھکانے کی
خسارہ پائے گا جو سچ کی راہ چھوڑے گا
قسم خدا نے اٹھائی ہے یوں زمانے کی
سبھی کے درد کو بانٹو محبتیں دے کر
خیالؔ بات کرو تم جو مسکرانے کی
۔۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ