اب دل پہ اختیار کا قصّہ تمام شُد
Posted: Tue Dec 22, 2020 5:17 am
قارئین کرام ایک پرانی تحریر جو اکتوبر ۲۰۱۲ میں لکھی تھی سلام کے ساتھ آپ احباب کی خدمت میں پیش ہے اپنی قیمتی آرا اور محبتوں سے نوازیئے
عرضِ خدمت ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اک دلربا سے پیار کا قصّہ تمام شُد
اس جیت اور ہار کا قصّہ تمام شُد
تجھ سے وفا کے بدلے میں تنہائیاں ملیں
اے دوست تیرے یار کا قصّہ تمام شُد
پھولوں کے ارد گرد ہیں کانٹے نکل پڑے
گل رنگ پر نکھار کا قصّہ تمام شُد
اک عندلیب گا رہا ہے نغمہ درد کا
ہے میرے مرغزار کا قصّہ تمام شُد
پتّوں نے ساتھ چھوڑ دیا چل پڑی ہوا
آئی خزاں بہار کا قصّہ تمام شُد
مت کیجیو علاج مرے چارہ گر کہ اب
بیمار دل فگار کا قصّہ تمام شُد
دھڑکن جواب دے گئی سانسیں بھی رک گئیں
اس زیست کے خمار کا قصّہ تمام شُد
آئی قضا قفس میں پرندہ تھا اڑ گیا
پندارِ خاک دار کا قصّہ تمام شُد
وہ جاتے جاتے دل بھی مرا لے گیا خیالؔ
اب دل پہ اختیار کا قصّہ تمام شُد
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ