قارئین کرام آداب عرض ہیں ایک سال پرانا کلام پیشِ خدمت ہے امید ہے پسند آئے گا ، اپنی آرا سے نوازیے
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تجھ کو زمانے بھر کی پذیرائیاں ملیں
کیوں اس کے بعد بھی تجھے رسوائیاں ملیں
نیّت میں تیری جب بھی کہیں آ گئی کمی
اونچائیوں سے گر پڑا اور کھائیاں ملیں
اس زندگی پہ کوئی کرے کیسے اعتبار
غم مجھ کو مل گئے تجھے شہنائیاں ملیں
پستی میں رہنے والے نہیں پا سکے عروج
پرواز کر کے بھی نہیں اونچائیاں ملیں
انجام اختلاف کی جب بھینٹ چڑھ گیا
ادراک میں تعرّض و تنہائیاں ملیں
جب آپ مسکرا کے ہمیں دیکھنے لگے
تو زندگی کی دلنشیں رعنائیاں ملیں
آج آپ کے خلاف وہی لوگ ہو گئے
جن میں تھیں آپ کو کبھی اچھائیاں ملیں
اپنے جو دوستوں نے اکیلا کیا مجھے
مشکل گھڑی میں زیست کی تنہائیاں ملیں
جس پر خیالؔ تم تھے بھروسا کیے ہوئے
اس میں فریب کی تمہیں پرچھائیاں ملیں
۔۔۔۔۔۔۔۔۔۔۔۔
طالبِ نظر
اسماعیل اعجاز خیالؔ