ہر وقت صبح و شام سنورنا پڑے مجھے

[ismail ajaz]

قارئین کرام آداب عرض ہیں ، چار سال پرانا کلام آپ احباب کی نذر ، امید ہے پسند آئے گا اپنی آرا سے نوازیے شکریہ۔
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔۔۔
دل چاہتا نہ ہو جسے کرنا پڑے مجھے
نظروں سے آپ کی بھی اترنا پڑے مجھے

ایسا نہ ہو کہ آپ مرا سامنا کریں
اور بے نیاز ہو کے گزرنا پڑے مجھے

اے زندگی تُو اور نہ لے میرے امتحاں
جو ٹوٹ کر زمیں پہ بکھرنا پڑے مجھے

مت ترس کھا کے بھیک محبت کی دیجیے
پھر زندگی میں جیتے جی مرنا پڑے مجھے

کس بات سے یہاں کسی کا ٹوٹ جائے دل
کچھ بولنے سے پہلے ہی ڈرنا پڑے مجھے

حد ہوتی ہے جناب ہر اک بات کی اگر
کیجے ستم کہ حد سے گزرنا پڑے مجھے

اپنے حسین ہونے کا ہے زعم کس قدر
آئینہ ان کے سامنے کرنا پڑے مجھے

جب سے ہیں مجھ میں آپ لگے عیب دیکھنے
ہر وقت صبح و شام سنورنا پڑے مجھے

دل میں اٹھے جو درد بہے آنکھ سے خیالؔ
بڑھ جانے سے غبار ، نکھرنا پڑے مجھے
۔۔۔۔۔۔۔۔۔۔۔۔۔۔۔۔۔۔۔۔۔۔
آپ کی محبتوں کا طلبگار
اسماعیل اعجاز خیالؔ