خرد کی آنکھ سے قدرت کے کارواں تو دیکھ

[ismail ajaz]

قارئین کرام ایک کلام 2011 میں رقم کیا آپ کی نذر ، امید ہے پسند آئے گا اپنی آرا سے نوازیے
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔۔۔
نظر اٹھا کے ذرا سوئے آسماں تو دیکھ
زمیں کی عاجزی اور بحرِ بیکراں تو دیکھ

تُو اپنی سوچ کے محدود دائروں سے نکل
خرد کی آنکھ سے قدرت کے کارواں تو دیکھ

تمام عمر سدا خامیاں ہی دیکھے گا
چپھی ہیں دوسروں میں کتنی خوبیاں تو دیکھ

حصولِ دنیا کو مقصد بنا لیا تُو نے
تجھے بھی جانا ہے انجامِ رفتگاں تو دیکھ

نکال دل سے عداوت و کبر و نفرت کو
کہ مُسکرا کے ذرا شکلِ دلبراں تو دیکھ

خفا خفا سا تُو کیوں خود سے روٹھا رہتا ہے
تُو زندگی میں کبھی خود کو شادماں تو دیکھ

ضرور ہوگی تجھے میری قدر بھی اک دن
مرے سوا ہے ترا کون قدرداں تو دیکھ

خیالؔ دیکھ لے خود کو نکال کر فرصت
تُو اپنے آپ کو کچھ ہو کے مہرباں تو دیکھ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجازخیالؔ