آپ اپنی شمع اپنے لیے خود جلائیے
Posted: Mon Jan 23, 2023 5:27 am
قارئین کرام ایک فی البدیہہ غیر مردّف تازہ کلام پیشِ خدمت ہے ، میس ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔
دل کے پھپھولے کھول کے ہم کو دکھائیے
غم ہم سے اپنے بانٹیے اور مسکرائیے
مانا کہ زندگی میں نشیب و فراز ہیں
ہر کیفیت میں زندگی جی کر دِکھائیے
چپکے سے آپ نے ہمیں آ کر ڈرا دیا
ایسی شرارتوں سے اجی باز آئیے
ہر کوئی تیرگی کو فضاؤں میں دے فروغ
آپ اپنی شمع اپنے لیے خود جلائیے
ہے مشکلوں کے دور میں دشوار زندگی
آسانیوں سے زندگی آساں بنائیے
سب میں کمی ہے کون ہے جس میں نہیں ہے عیب
لوگو ں کا اس طرح تو نہیں دل دُکھائیے
اللہ کو پکاریے گر چاہیے مدد
اللہ سے دُعا کے لیے ہاتھ اُٹھائیے
چھوٹی سی زندگی ہے جسے جی رہے ہیں آپ
جو ہیں خفا انہیں بھی گلے سے لگائیے
مہلت خُدا سے روز جو ملتی ہے آپ کو
توبہ خیالؔ کیجیے دنیا سے جائیے
۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ