• Harf-e-"BE" se ash'aar raqam kijiiye...shukria

Posted: **Sat Apr 30, 2005 1:09 pm**

salaam dosto,

Harf-e-"ALIF" se 111 posts ho chukiiN thiiN, lehaaza ab ham Harf-e-"BE" se ash'aar raqam kareN to behtar hogaa. shukria. pahlaa she'r pesh-e-Khidmat hai:

butaan-e-mahvish ujaRii huii manzil meN rahte haiN
k jis kii jaan jaatii hai, usii ke dil meN rahte haiN

DaaGh Dehlavii

Posted: **Sat Apr 30, 2005 9:00 pm**

ba-zaahir shaan-o-shaukat se khaRe haiN
sab andar se magar TooTe paRe haiN
bakhsh

Posted: **Sun May 01, 2005 12:41 am**

ba'd muddat unheN dekh kar yuuN lagaa
jaise be_taab dil ko qaraar aa gaya
aarzuuoN ke gul muskuraane lage
jaise gulshan meN jaan-e-bahaar aa gayaa

Roshan "Nanda"

Posted: **Sun May 01, 2005 12:44 am**

baa,d muddat ke khile daaman-e-ummeed ke phool
der ke baa,d baharoN pe nikhaar aayaa hay
nafis ahmad siddiqui

Posted: **Sun May 01, 2005 12:48 am**

baadaloN kaa qaafila aataa huaa achchhaa lagaa
pyaas kii dhartii ko har saavan baRaa achchhaa lagaa

[naa'ma'loom]

Posted: **Sun May 01, 2005 12:50 am**

baaGhbaaN ka ye taqazah hay keh ab gulshan meiN
baad-e-sar sar bhi chale, naam sabaa ka rkhna
bakhsh

Posted: **Sun May 01, 2005 12:53 am**

badalte waqt kaa ik silsila saa lagtaa hai
k jab bhii dekho use, duusraa_saa lagtaa hai

Manzar Bhopaalii

Posted: **Sun May 01, 2005 1:10 am**

balaa ke haadise kashtee -o-baadbaan me thay
samumdaroN pe magar ik sukoot taarii tha
bakhsh

Posted: **Sun May 01, 2005 1:53 am**

baat karnii mujhe mushkil kabhii aisii to na thii
jaisii ab hai terii maHfil kabhii aisii to na thii

Bahaadur Shaah "Zafar"

Posted: **Sun May 01, 2005 2:00 am**

baraste badaloN ke raqs aasmaaN meiN thay
dahakte pyaas ke kaanTe bhi har zabaan meiN thay

bakhsh

Posted: **Sun May 01, 2005 2:11 am**

badal diyaa hai nigaahoN ne ruKh zamaane kaa
kabhii rahaa hai zamaane pe iKhtiyaar mujhe

Azeez Waarsii

Posted: **Sun May 01, 2005 2:13 am**

ba-sad afsos apna jhoNpRa tak ham luTaa aaey
gumaaN ye tha keh wo khana-badoshoN ko mahal dega
bakhsh

Posted: **Sun May 01, 2005 2:18 am**

baat phuuloN kii sunaa karte the
ham kabhii she'r kahaa karte the

Saagar Siddiqui

Posted: **Sun May 01, 2005 2:22 am**

baRe khuloos se apna liya hay ghar ki tarah
maiN taa-hayaat nazar-band jis qafas meiN rahaa
bakhsh

Posted: **Sun May 01, 2005 2:24 am**

badlaa na apne aap ko, jo the, vahii rahe!
milte rahe sabhii se, magar, ajnabii rahe

Nidaa Faazlii