خیالؔ کچھ تو سخاوت کا تم کرو اظہار
Posted: Sat Mar 25, 2023 9:18 am
قارئین کرام ایک کلام ۲۲ مارچ ۲۰۲۳ میں لکھاپیشِ خدمت ہے ، امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔۔
نہ عارضی کسی شوکت کا تم کرو اظہار
نہ زندگی کی رعُونَت کا تم کرو اظہار
خُدا نے دی تمہیں طاقت تمہاری کیا اوقات
تو عاجزی سے صداقت کا تم کرو اظہار
وفا کی بات ہے لوگو تو جان دو اپنی
فقط زباں سے نہ الفت کا تم کرو اظہار
جو ہو سکے تو کرو درگزر زمانے کو
نہ بات بات پہ نفرت کا تم کرو اظہار
توقعات تمہیں سب سے نیک رکھنی ہیں
تونیک بن کے محبت کا تم کرو اظہار
بجز خدا کے کسی اور کو نہیں پوجو
جو لاشریک عبادت کا تم کرو اظہار
کھلے نہ حال کسی پر اگر بھرم رکھ لو
نہ رونے دھونے کی عادت کا تم کرو اظہار
ہے دوسرے کی محبت تمہارے دل میں اگر
تو اپنے واسطے عزّت کا تم کرو اظہار
مرے خلوص کی ناقدری کر رہے ہو تم
لحاظ رکھ کے مُروّت کا تم کرو اظہار
جو مُسکرا کے ملے اُس سے مُسکرا کے ملو
خیالؔ کچھ تو سخاوت کا تم کرو اظہار
۔۔۔۔۔۔۔۔۔۔۔۔۔۔۔۔۔۔۔
توجہ کا طلبگار
اسماعیل اعجاز خیالؔ