کھولی زباں تو دوستوں سے دشمنی رہی
Posted: Wed Nov 27, 2024 9:23 pm
یہ کلام ۲۸ ستمبر ۲۰۲۳ میں لکھا گیا تھا
قارئین کرام ایک تازہ کلام پیشِ خدمت ہے امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔
خاموشیوں میں دوستی سب سے بنی رہی
کھولی زباں تو دوستوں سے دشمنی رہی
ہمدردیاں ملیں ہمیں جب تک سہے ستم
شکوہ کیا تو نفرتوں سے ہی ٹھنی رہی
رکھی منافقانہ روش سب فدا ہوئے
سچائی کی ڈگر پہ تو جاں پر بنی رہی
اس دوغلے جہان میں سب دوغلے ہیں لوگ
کردار میں سبھی کے جبھی رہزنی رہی
بے اختیار لوگ یہاں ہیں شریف ذاد
با اختیار لوگوں کی گردن تنی رہی
اغراض کے اندھیرے سبھی رشتے کھا گئے
مطلب پرست زندگی بِن روشنی رہی
بدلی کی اوڑھنی میں چھپا دلفریب چاند
شرما گیا حسین مگر چاندنی رہی
تم نے خیالؔ راگ الاپا ہے کون سا
جس میں شعور کھو گیا بس راگنی رہی
۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ