کردار نے جب آئینہ تجھ کو دکھا دیا
Posted: Wed Nov 27, 2024 9:35 pm
یہ کلام ۲۷ اکتوبر ۲۰۲۳ میں لکھا گیا تھا
قارئین کرام آداب عرض ہیں ، کچھ حالاتِ حاضرہ پر مبنی صورتِ حال پیشِ خدمت ہے
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔
دنیا میں تو نے آ کے بتا خود کو کیا دیا
دھوکا دیا کسی کو تو وہ خود کو تھا دیا
اللہ کے نظام میں کر کے مداخلت
ہے آدمی نے سر کشی میں سر اٹھا دیا
جس پر کیا بھروسہ وہی بے وفا بنا
دے کر فریب تم نے بھی اچھا صلہ دیا
لوگوں سے نفرتوں بھرے لہجے میں بول کر
الفت کا تو نے راستہ خود سے گنوا دیا
عزت اچھالنا تو ترا مشغلہ رہا
گندی زبان بولنا سب کو سکھا دیا
خود کو تو پارسائی کی دیتا رہا سند
کردار نے جب آئینہ تجھ کو دکھا دیا
بے غیرتی میں ساری حدیں پار ہو گئیں
شہوت پرست قوم کو وحشی بنا دیا
دھوکا خیالؔ موت کو تو دے نہ پائے گا
گو خود کو تو نے زیست میں دھوکا سدا دیا
۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ