Harf-e-"CHE" se ash'aar raqam kijiiye...plz.

Post by **Hashmat Usmani** » Tue Jul 05, 2005 6:21 am

is 'ashre ke liye Harf-e-"CHE" se ash'aar qalam_band kijiiye...shukria.

chaahat kaa ek miiThaa, miiThaa dard jagaane shaam Dhale
terii yaadeN aa jaatii haiN mujh ko rulaane shaam Dhale

Hasan Imaam

Post by **Hashmat Usmani** » Wed Jul 06, 2005 5:02 am

chaahiye, achchhoN ko jitnaa chaahiye
yeh agar chaaheN, to phir kia chaahiye!

Chachaa

Post by **Hashmat Usmani** » Thu Jul 07, 2005 2:43 am

chashm_bar raah-e-shauq ke maare
chaand ke intezaar meN taare

Josh Malihabadai

Saba · Post by **Saba** » Sun Jul 10, 2005 5:40 am

charaagh e ahle janoon hain keh deedahwar kay charaagh

qadam qadam peh hain raushan nazar nazr kay charaagh

Post by **Waqar Zaidi** » Sun Jul 10, 2005 6:02 am

chashm e tar say jab dur e khush aab barsaayain gay ham

mah o anjum ki zia paashi ko sharmayain gay ham

===============================================

chashm e mai goon say istafaadah hay

kia behaknay kaa phir iraadah hay

===============================================

chaman say jaatay huay chaman ko tilism e hairat banaa gaye tum

wahaan wahaan phir khizaan na aaii jahaan jahaan muskuraa gaye tum

===============================================

charaagh e gham kadah kartaa hay raushan

shab e furqat koii barq e tapaan say

===============================================

chaman hay main hoon tum ho chaandni hay

bohat din baad yeh mehfil saji hay

===============================================

Post by **PK Swami** » Sun Jul 10, 2005 4:38 pm

chal sath k hasrat dil.e marhoom se nikle
aashiq kaa janaazaa hai zara dhoom se nikle

chaak hai daamane qabaa.e baHaar
mere khwaabooN ke peRhan kee tarah

chalee duniya meiN rasm.e sazdaa rezee
kuchh unke dar se kuchh merii zabeeN se

choree kaheeN khule na naseem.e bahaar kee
khushboo uRaa ke laayee hai gesoo.e yaar kee

cheHre badle khud ko tarashaa apnaapan nilaam kiyaa
tab jaa kar iss bastee mein ham baa.izzat kaHlaaye haiN

chaman pe baS naheeN varnaa mere chaman wale
hawaaieN bechte, nelaam rang.o.boo karte

chaman saamne hai shikastaa haiN baazoo
khajal ho rahe haiN, ham aazaad ho kar

cheHre ke phool, zulf kee khushboo, badan kee aaNch
kyaa kyaa sameT laayee teri yaad kee hawaa

chale the aik nazar teri bazm dekh aayeeN
yahaaN jo aaye to be.ekhtiyaar baith gaye !

Regards
PK Swami

Post by **Hashmat Usmani** » Mon Jul 11, 2005 3:21 am

chupke_chupke raat din aaNsuu bahanaa yaad hai
ham ko ab tak 'aashiqii kaa vo zamaanaa yaad hai

Hasrat Mohaanii

Post by **Hashmat Usmani** » Mon Jul 11, 2005 4:42 am

chaandnii chhat pe chal rahii hogii
ab akelii Tahel rahii hogii

Dushyant Kumar

Post by **Waqar Zaidi** » Mon Jul 11, 2005 3:36 pm

chalo ham tum wahaan zaraa baithain

kab say hay saaya e shajar tanhaa

===============================================

chaarah saaz e ishq ki aankhon main aansoo aa gaye

zakhm e dil ki aaj gehraaii kaa andaazah huaa

===============================================

chashm e khaamosh ko kisi kay hazoor

aa gayaa guftugoo kaa dhab goyaa

===============================================

chaarah gar say elaaj kia ho gaa

dosto ! zindagi kay maaron kaa

===============================================

Post by **Hashmat Usmani** » Tue Jul 12, 2005 2:53 am

chaand tanhaa hai, aasmaaN tanhaa
dil milaa hai kahaaN kahaaN tanhaa

Meena Kumari "NAAZ"

Post by **Waqar Zaidi** » Tue Jul 12, 2005 5:07 am

chaand nikla aur falak par zau fashaan honay lagaa

dard yaadon kaa barhaa aur baikaraan honay lagaa

===============================================

Post by **Hashmat Usmani** » Wed Jul 13, 2005 2:37 am

chal mere saath hii; chal, ai merii jaan-e-Ghazal!
in samaajoN ke banaaye huye bandhan se nikal, chal!

Hasrat Jaipuri

Abdullah Nazir · Post by **Abdullah Nazir** » Wed Jul 13, 2005 2:04 pm

Chaarah-gar teri chashm-e-karam chaahiye

daulat o zar nah jaah o Hasham chaahiye.

Nazir.

Post by **PK Swami** » Wed Jul 13, 2005 5:28 pm

chaman meiN jo bhee they naafiz, osool uske the
tamaam kaNte hamaare the, phool uske the

PK Swami

Abdullah Nazir · Post by **Abdullah Nazir** » Thu Jul 14, 2005 11:10 am

chaahtaa hooN ke shab-e-vaSl muqaabil tere

apnaa dil cheer ke balaaooN ke us meiN kyaa hei.

Nazir.

Harf-e-"CHE" se ash'aar raqam kijiiye...plz.

Harf-e-"CHE" se ash'aar raqam kijiiye...plz.

oeem

"cheem"