Aek bahut purani ghazal - -- - by: Abdullah Nazir

[Abdullah Nazir]

MuHtaramaat o MuHtarameen
aHbaab-e-sukhan,

Purkhuloos Tasleemaat, :rose

Aek bahut purani ghazal jou maiN ne 1982 se pahle kahi thii, pesh karrahaa hooN. Ummeed keh aap apne giraaNqadr tabSiraoN se navaazenge.

G H A Z A L roman meiN.

Saihbaa ne jou karwaT lii, sar phir gayaa boutal kaa
Saaghar kahiN laihraayaa, paimaaNah kahiN chalkaa

Masti meiN javaani kii, kyaa Tarz-e-khiraamaaN hei
Housh usko nahiN bilkul, daaman kaa nah aanchal kaa

Her lamHa-e-ishrat yooN, be-faiZ nazar aayaa
Jaise koii saayah hou, uRte houe baadal kaa

Apni bhii siah-bakhti , taAreef ke qaabil hei
jisTarH sajeelaa-pan , un aankhaoN meiN kaajal kaa

her gaushah gulistaaN kaa firdaus badaamaaN thaa
yeh waaqiAah ab lekin, hei guzre houe kal kaa

Ai mauj-e-Hawaadic jab, ToofaaN ke muqaabil hooN
Kyaa khauf Tamaanche kaa, hou zour kaa yaa halkaa

Nazir yeh taghazzul bhii, ik zauq-e-taghazzul hei
Yaa harzah-saraayi meiN, andaaz hei paagal kaa
=======

Aapka Mukhlis,
Nazir.

[jawaid badauni]

Mohtarmee wa Mokarramee Nazir Sb.,
Aadaab

Aapki Ghazal nazar nawaz hoii. Wallah, yeh zuban, yeh andaz,
yeh rung, iss ahd meN ik daulat-e kamyaab hai. Kuch to hai
purani Ghazal meN jo nayee Ghazal oss per haavee nahiN ho
sakee. Bahut haseen Ghazal hai aap ki, tamaam ashAAr rung-e
taGhazzzul se malaamal haiN aur sherriyat se bharpur bhi.

Meri nacheez daad.o.tahseen qubool farmaiyega.

Mukhlis
Jawaid