TARAHI GHAZAL - -- - (GUZ.9) by: ABDULLAH NAZIR.

[Abdullah Nazir]

MuHtaramaat o MuHtarameen
aHbaab-e-sukhan,

Purkhuloos Tasleemaat, :rose


Guzarish 9 ke miSreA per apni TaraHi ghazal pesh karrahaa hooN. Ummeed ke aap apne tabSiraoN se navaazkar shukriya adaa karne kaa mauqaA denge.

GHAZAL roman meiN.

fikr-e-deed-e-jamaal kyaa karte
aapke khastah Haal kyaa karte

intizaar-e-viSaal kyaa karte
be-rukhi kaa malaal kyaa karte

dasht-e-ghurbat kii dhoop meiN jalkar
hougaye ham niDhaal kyaa karte

seekhte rehgaye nazaakat-e-fun
iddiAay-e-kamaal kyaa karte

raahzan se hameN thii kyaa ummeed
shikwa-e-ikhtilaal kyaa karte

jin ko furSat nah thii sanwarne se
mere dil kaa khayaal kyaa karte

jou bhaRakte charaagh jaise thay
zulmataoN se qitaal kyaa karte

ai behi-khwaah-e-qalb-e-aazurdah
ham tiri dekh bhaal kyaa karte

kaun dunyaa meiN sunne waalaa thaa
be-jhijak ham sawaal kyaa karte

aur risne lagaa hei zakhm-e-jigar
koushish-e-indimaal kyaa karte

ham samajhne lage thay unke sukhan
baat ko goul maal kyaa karte

sounp dete nah gar zamaane ko
HaaSil-e-maah o saal kyaa karte

Ishq-e-sheAr o sukhan meiN Doob gaye
Warnah jeenaa muHaal kyaa karte

Ham thay aur aek Heelah-joo Nazir
Zindagi paa'imaal kyaa karte.
=====

Aapka Mukhlis,
Nazir.

[jawaid badauni]

Mohtarmee Abdullah Nazir Sahab,
Aadaab

Ek baar phir aap ne nihayat murassah tarahee Ghazal se nawaza hai. Umdah zubaan, har sher sherriyat aur aamad ki micaal aur nuhayat dushwaar qawafee ka haq bajanib istailam, yeh sub cheezeN aapki kohna mashqee ki tarjumaan haiN.

Meri nacheez daad qubool farmaaiye.

Muhlis
Jawaid

[khozema husaini]

mohtaram nazir saheb

aadaab

is khoobsoorat ghazal ke liye meri janib se dili daad qubool farmayen

Husaini

[Abdullah Nazir]

MuHtarami o Azeezxi
Jawaid Badayuni Saahib,

Purkhuloos Tasleemaat,

Aap kii zarrahnavaazi ke liye behad shukrguzaar hooN. Aapko ghazal pasand aayi jou mere liye khushi kaa baaAic hei.

Ummeed ke aayindha bhi aap meri Hauslah afzaayi farmaate rehenge.


Aapka Mukhlis,
Nazir.

[zmufti]

Mohtaram Abdullah Nazir sahib
Tasleemat
Aap ki ghazal parhi
aap ne is maiN mukhtalif mazameen bari khubsurti se bayaN kiye haiN
Meri janib se daad-o-mubarik baad qabool kijye
youN to sabhi asha'ar khub haiN magar mujhe yeh ziyada pasand aaye


ai behi-khwaah-e-qalb-e-aazurdah
ham tiri dekh bhaal kyaa karte

kaun dunyaa meiN sunne waalaa thaa
be-jhijak ham sawaal kyaa karte

aur risne lagaa hei zakhm-e-jigar
koushish-e-indimaal kyaa karte


Ishq-e-sheAr o sukhan meiN Doob gaye
Warnah jeenaa muHaal kyaa karte

regards
zmufti

[Shummu]

wah bahut khoob....aap ki ghazal bahut pasand aayi..kayi naye qaawaafee bhi jaan_ne ko mile...daad haazir hai!

Shumaila