maah-e-DEC ke muntakhib shaayar:KHUMAAR BARABANKWI

[Shummu]

ek pal me.n ek sadii kaa mazaa ham se puuchhiye
do din kii zindagii kaa mazaa ham se puuchhiye

bhuule hai.n unhe.n raftaa raftaa mudatto.n me.n ham
qishto.n me.n Khud_kushii kaa mazaa ham se puuchhiye

aaGaaz-e-aashiqii kaa mazaa aap jaaniye
anjaam-e-aashiqii kaa mazaa ham se puuchhiye

jalte diyo.n me.n jalte gharo.n jaise zau kahaa.N
sarakar raushnii kaa mazaa ham se puuchhiye

vo jaan hii gaye ke hame.n un se pyaar hai
aa.Nkho.n kii muKhbarii kaa mazaa ham se puuchhiye

ha.Nsane kaa shauq ham ko bhii thaa aap kii tarah
ha.Nsiye magar ha.Nsii kaa mazaa ham se puuchhiye

ham taubaa kar ke mar gaye bemaut ai 'Khumar'
tauhiin-e-maikashii kaa mazaa ham se puuchhiye

khumaar barabanqvi

[Shummu]

Voh kaun haiN jo ghum ka maza jaante nahi
bas doosroN ke dard ko pehchaante nahiN

is jabre maslehat se tou ruswaiyaN bhali
jaise ke hum unhe voh humeiN jaante nahiN

kambakht aankh uthi na kabhi, un ke roo baru
hum unko jaante tou haiN pehchaante nahiN

vayez khuloos hai tere andaaz'e fikr meiN
hum teri guftagu ka bura maante nahiN

hadd se barhe tou ilm bhi hai jahl dousto
sab kuch jou jaante haiN voh kuch jaante nahiN

rehte hain aafiyet se vahi log aye 'Khumaar'
jou zindagi mein dil ka kaha maante nahiN

[muazzam]

Bhut Khoob
La Jawab

[Shummu]

bahut shukriya aur khushaamadeed muazzam sahab..aap bhi kuch pesh karein to khushi hogi...

[Shummu]

[Shummu]

ye misra nahin hai, wazeefa miraa hai
Khuda hai muhabbat, muhabbat Khudaa hai

kahuuN kis tarah main ke wo bewafaa hai
mujhe uski majboorioN ka pataa hai

hawaa ko bahut sarkashi ka nashaa hai
magar ye na bhoole, diyaa bhi diyaa hai

main usse judaa hun, wo mujhse judaa hai
muhabbat ke maaroN ka fazl-e-Khudaa hai

nazar mein hai jalte makaanoN ka manzar
chamakte hain jugnoon to dil kaanptaa hai

unhein bhoolna ya unhein yaad karna
wo bicchde hain jabse yahi mashgalaa hai

guzartaa hai har shaks chehraa chupaaye
koii raah mein aaiinaa rakh gayaa hai

kahaaN tu “Khumar” aur kahaaN kufr-e-taubaa
tujhe paarsaaoN ne behkaa diyaa hai

[Shummu]

tere dar se utth kar jidhar jaooN main
chalooN do qadam aur thehar jaooN main

agar too khafa ho to parwaah nahiin
tera gham khafa ho to mar jaooN main

tabassum ne itna daNsaa hai mujhe
kalee muskuraye to darr jaooN main

sambhaale to hun khudko tujh bin magar
jo choo le koii to bikhar jaooN main

Khumar Barabankvi

[Shummu]

ai maut! unhein bhulaaye zamaane guzar gaye
aa jaa ki zahar khaaye zamaane guzar gaye

o jaane vaale aa ki tere intazaar mein
raste ko ghar banaaye zamaane guzar gaye

gham hai na ab khushi hai na ummid hai na yaas
sab se nijaat paaye zamaane guzar gaye

kya laayaq-e-sitam bhii nahin ab main doston
patthar bhi ghar mein aaye zamaane guzar gaye

jaane bahaar phuul nahin aadmi hun main
aa jaa ki muskuraaye zamaane guzar gaye

kya kya tavaqqoat thi aahoN se ai ‘Khumar’
ye teer bhi chalaaye zamaane guzar gaye