Saal-e nau............Ek Qita

[jawaid badauni]

Qita:


Saal-e nau kash aisa ho Ya Rub!

Subke dil meN ho bus Khooshi ki umaNg

Har taraf ho fazaa-e amn.o.sukoon

Nah "Tsunami" nah zalzaley hoN nah jung



Jawaid Badauni

[Shummu]

wah Ameen....aap ke muunh mein ghee shakkar..kaash aisa ho jaaye........

[Abdullah Nazir]

MuHtarami o Azeezi
Jawaid Badayuni SaaHib

PurkhulooS tasleemaat,

Aapkaa QitAa manavi liHaaz se bahut pasand aayaa jiske liye daad aur mubaarakbaad qubool farmaayiye. Albattah iskaa vazn samajhne meiN mujhe diqqat pesh aayi hei. Hasb-e-maqdoor iski taqTeeA yooN karsakaa. Housaktaa hei ke maiN kaamyaab nah housakaa. Aap bhi dekh leejiye.

Saal-e nau kash aisa ho Ya Rub!
Salenauka....sh'ais'hou......yarub
/0//0/0......//0//0...../0/0
=2122......1212.....22
=faa'ilaa'tun....mufaa'ilun....feAlun

Pahle miSreA ki taQTeeA durust hei. (Nazir)


Subke dil meN ho bus Khooshi ki umaNg
subkdilmeiN...h'buskhu......shi'ki'uman
/0//0/0.....//0/...... /0/0//0
faa'ilaa'tun.....fa'oolu.....mus'taf'ilun

Is miSreA ki taqTeeA yooN housakti hei:
sabk'dil'meiN = faa'ilaa'tun
h'bus'khushee=mufaa'ilun (is meiN "bus" ke Harf "seen" aur "khushee" ke Harf "khai" kaa ijtimaaA caqeel hougayaa hei.)
kiumaNg = faa'ilun yaa (agar lafz :ki" ke Harf "ye" ko girayeN tou) f'Ailun"
MulaaHizah: Agar is miSreA ki taQTeeA aap khud farmayeN tou meri maAloomaat meiN izaafah hougaa.


Har taraf ho fazaa-e amn.o.sukoon
=her'taraf'ho....fazaa'e....amnosukooN
/0//0/0.........//0/......./0/0//0
=2122……….121………2212
faa'ilaa'tun….fa'oolu……mus'taf'ilun

is miSreA kii taQTeeA yooN housakti hei:
hertarafho = faa'ilaa'tun
fazaa'e'am = mufa'ilun (is rukn meiN "ye" ke hamza aur Harf-e-alif kaa ijtimaaA caqeel hougayaa hei.
n'amaN = f'Ailun
MiSraA baharhaal vazn meiN hei.


Nah "Tsunami" nah zalzaley hoN nah jung
nasunaami...........n'zalzuleyhoN.....njung
///0/0....................//0//0/0...............//0/
1122....................12122................121
f'ilaa'tun..............mufaa'ilaa'tun......fa'ool

is miSreA ki saHeeH taqTeeA yooN housakti hei:
n'sunaami = f'Ailaatun (faa'i'laatun ko f'Ailaatun karsakte heiN)
n'zalzale = mufaa'ilun
houNn'juNg =faa'Ailun (yahaN bhi yehi sawaal paida houta hei ke kyaa aakhiri rukn ko "faa'i'lun" ke vazn per isteAmaal karsakte heiN. Kiyunkeh mujhe sirf itnaa maAloom hei ke "feAlun", "f'Ailun" aur "feAlaat" isteAmaal karsakte heiN.
Iltimaas. Agar in masaayil ki koii tashreeH kareN tou maiN beHad mamnoon hooNgaa. Shukriya.

Aakhir meiN, apni ghalatiyaoN per dobaarah nadaamat kaa izhaar kartaa hooN.
=======


Aapkaa MukhliS,
Nazir.

[jawaid badauni]

Mohtarmee Abdullah Nazir SaHab, aadaab

CharoN miSrey bahr meN haiN. UmaNg lafz ka GAAF gir raha hai magar miSrey ke aaKhree lafz meN aisa karna jaa`iz hai. Nez yeh ke Tsunami ko bawzn FAOOLUN istaimal kiya gaua hai kyooNkeh is lafz meN "Tee" wiase bhi Khamosh "silent" rahta hai. Qita bahr meN hai.

Shukriya,

Jawaid

[Abdullah Nazir]

MuHtarami
Jawaid Badayuni SaaHib,

PurkhulooS tasleemaat,

Aapkaa kehnaa bajaa hei ke aapkaa QiTAa beHr meiN hei aur uski beHr Behr-e-khafeef makhboon meHzoof yaa maQTooA hei.
=faa'ilaa'tun mufaa'ilun feAlun (jiske aakhiri rukn ko ghair qaafiyah-band miSraAoN meiN feAlun, f'Ailun yaa feAlaat karne kii ijaazut hei.)

MaiN apni ghalaTi per naadim hooN jiski vajah meri ujlat thii aur MSN per mudaakhilat. Baharhaal is Haalat se mujhe yeh sabaq milaa hei ke aek waqt meiN do kaam nahiN karnaa chaahiye.

MaiN apni ghalati ko saHeeH karke apni tashreeH pesh karungaa. JahaN tak Harf "gaaf" kaa taAlluq hei lafz "umaNg" aur "juNg" mein tou Harf-e-noon ko noon-e-ghunnah tasleem karnaa paRegaa. Wo is liye ke qaaAide ke liHaaz se 2 saakin Huroof aek saath aayeN tou doosre ko giraa nahiN sakte balke usko zabar lagaakar mutaHarrik karsakte heiN. Isi liye umang ko "umag" aur jung ko "jug" ki TaraH paRhnaa paRega yaAni TaQTeeA meiN "noon" kaa Hisaab nahiN rahegaa.

MaiN apni is faash ghalaTi ke liye beHad maAziratkhwaah hooN.


Aapka MukhliS,
Nazir.

[jawaid badauni]

Ajee Sarkaar maiN to Khoosh hooN is bahane aap se kuch adabee guftagoo ho gaii warnah aap haath kahaN lagte haiN.

Ummid hai aaindah bhi mulaqat hoti rahegi.

Khair Andesh,

Jawaid