Guz.13 ke miSreA per TaraHi Ghazal: Abdullah Nazir.

[Abdullah Nazir]

MuHtaramaat o MuHtarameen
aHbaab-e-sukhan,

PurkhulooS tasleemaat, :rose

Guzarish 13 ke TaraHi miSreA per apni ghazal pesh karne kii saAadat HaaSil karrahaa hooN. Ummeed ke aap apni giraaNqadr aaraa se navaazkar shukriyah adaa karne ka mauqA denge.

GHAZAL, roman meiN

shaam-e-hijraaN muZTarib hooN ji bahut ghabraaye hei
juz khayaal-e-yaar kyaa koii mujhe bahlaaye hei

ik tamaasha hei jo hamko zindagi dikhlaaye hei
koii jab maare hei Thoukar, koii Thoukar khaaye hei

aarzoo-e-deed, shauq-e-vaSl, aur khud-aagahi
"haaye kyaa kehiye ke dil ke saath kyaa kyaa jaaye hei"

ishrat-e-Ahd-e-muHabbat kyaa isi kaa naam hei
MaiN use samjhaarahaa hooN, wo mujhe samjhaaye hei

Talkhiy-e-Haalaat ne deevaanah hamko kardiyaa
Aap hi farmaayiye ab, aap ki kyaa raaye hei

Beniyaazi kaa bharam bhi ab kahaaN baaqi rahaa
Khaanah-veerani pah banjaarah bahut pachtaaye hei

Chandni meiN kiyuN mujhe kuch bhi nazar aataa nahiN
Kyaa koii naazuk-badan zulf-e-siyah bikhraaye hei

Sirf tum hi kab hou gharq-e-mastiy-e-naaz-e-jamaal
Nash'sha-e-sahbaay-e-ulfat mujhko bhi bahkaaye hei

Khush-naSeebi hei keh maiN jeene ke qaabil hooN abhi
Umr-e-raftah ko tiri hamsaayagi lauTaaye hei

Jisqadar darbaan-e-kaAbah bukhl per aamaadah heiN
Aur bhi dast-e-duAa :Nazir: tiraa phailaaye hei.
=======


Aapka MukhliS,
Nazir.

[Abdullah Nazir]

MuHtaramah o Azeezah
Saara SaaHibah

PurkhulooS tasleemaat,

Mujhe aapki beHad maSroofiyat kaa ilm hei is liye aapkaa mukhtaSar saa inaayaat naamah bhi mere liye aek niAmat se kam nahiN.

Guzarish 12 per maiN sheAr kehne se maAzoor rahaa jiski bahut saari vujoohaat theeN. BaharHaal is baar is sanglaakh zameen meiN apni ghazal mukammal karke HaaZir hougayaa hooN.

MuHtaram Jawaid Badayuni SaaHib tou aek jagah Dunya DeHlawi SaaHibah ko yaad farmaarahe heiN. Shayad wo chaahte heiN ke dunya SaaHibah bhi is mushkil miSreA per kuch kaheN.

Aapki ghazal kaa bhi intizaar rahegaa.


Aapka MukhliS,
Nazir,

[haamidbaaqri]

MuHtaramaat o MuHtarameen
aHbaab-e-sukhan,

PurkhulooS tasleemaat, :rose

Guzarish 13 ke TaraHi miSreA per apni ghazal pesh karne kii saAadat HaaSil karrahaa hooN. Ummeed ke aap apni giraaNqadr aaraa se navaazkar shukriyah adaa karne ka mauqA denge.

GHAZAL, roman meiN

shaam-e-hijraaN muZTarib hooN ji bahut ghabraaye hei
juz khayaal-e-yaar kyaa koii mujhe bahlaaye hei

ik tamaasha hei jo hamko zindagi dikhlaaye hei
koii jab maare hei Thoukar, koii Thoukar khaaye hei

aarzoo-e-deed, shauq-e-vaSl, aur khud-aagahi
"haaye kyaa kehiye ke dil ke saath kyaa kyaa jaaye hei"

ishrat-e-Ahd-e-muHabbat kyaa isi kaa naam hei
MaiN use samjhaarahaa hooN, wo mujhe samjhaaye hei

Talkhiy-e-Haalaat ne deevaanah hamko kardiyaa
Aap hi farmaayiye ab, aap ki kyaa raaye hei

Beniyaazi kaa bharam bhi ab kahaaN baaqi rahaa
Khaanah-veerani pah banjaarah bahut pachtaaye hei

Chandni meiN kiyuN mujhe kuch bhi nazar aataa nahiN
Kyaa koii naazuk-badan zulf-e-siyah bikhraaye hei

Sirf tum hi kab hou gharq-e-mastiy-e-naaz-e-jamaal
Nash'sha-e-sahbaay-e-ulfat mujhko bhi bahkaaye hei

Khush-naSeebi hei keh maiN jeene ke qaabil hooN abhi
Umr-e-raftah ko tiri hamsaayagi lauTaaye hei

Jisqadar darbaan-e-kaAbah bukhl per aamaadah heiN
Aur bhi dast-e-duAa :Nazir: tiraa phailaaye hei.
=======


Aapka MukhliS,
Nazir.

mohtaram abdullah nazir saahib
salaamun alaikum

bahut hi umda ghazal inaayat farmaaye hai.

lafzo.n ka chunaao uffff ab hum kya kahe.n.

hame.n aapse bahut kuch seekhne ko milraha hai.

is munfarid ustaadaana kalaam per hamaari dilee daad aur mubarakbad qubool farmaaye.n.

jazakallah

tifle maktab
haamidbaaqri

[RAUSHNEE]

Assalam O Alikum


Sir ,


Aap ka tu yonhee ghazal goee mein jawab nahi...... aur yeh ghazal .....Waah Kia khoob thee......

Meri adna see daad qubool keejyee

Raushnee

[Abdullah Nazir]

MuHtaramah
Raushnee SaaHibah,

PurkhulooS tasleemaat,

Aap ne meri ghazal ki pazeerayi farmaayi aur Aam Taur per mere kalaam ko bhii daad o teHseen ke qaabil samjhaa, jiske liye maiN aapkaa beHad shukrguzaar hooN.

Ummeed kartaa hooN ke aap aayindah bhi isi TaraH se meri HauSlah afaayi karti rahengi.


Aapka MukhliS,
Nazir.

[Abdullah Nazir]

MuHtaram
Haamid Baaqri SaaHib,

PurkhulooS tasleemaat,

Mere aek Azeez doust ne kayi baar mujhe tavajjuh dilaayi ke maiN apni ghazal per tabSirah karne waalaoN ko javaab dete houe tarteeb ka khayaal nahiN rakhtaa. Aaj yeh dekhkar waaqaAi apni naadaanistah bhool per sharmindah hooN aur aap se maAzirat khwaah bhi.

Yaqeen maaniye meri TaraHi ghazal per, aap ne meri dil khoulkar HauSlah afzaayhi farmaayi hei jiske liye maiN aapka shukriyah adaa karne ke liye munaasib alfaaz DhoonDne meiN naakaam rahaa hooN. Taaham, jazakallahu khair, tou kehsaktaa hooN. Ummeed kartaa hooN ke aayindah bhi apni nazar-e-inaayat se meHroom nah karenge.


Aapka MukhliS,
Nazir.