ek ghazal--Jigar

[Daanish]

kabhi shaakh-o-sabza-o-barg par, kabhi ghuncha-o-gul-o-khaar par
maiN chaman meiN chaahe jahaN rahuN, mira haq hai fasl-e-bahaar par

mujhe deN na ghaiz meiN dhhamkiyaaN, gireN laakh baar yeh bijliyaaN
miri sultanat yahi aashiyaaN, miri milkiyat yahi chaar par

jinheN kahiye ishq ki wus'ateiN, jo haiN khaas husn ki azmateiN
yeh usi ke qalb se poochhiye, jise fakhr ho gham-e-yaar par

mire ashk-e-khooN ki bahaar hai ke muraqq'a-e-gham-e-yaar hai
miri shayari bhi nisaar hai miri chashm-e-sihr-e-nigaar par

ajab inquilaab-e-zamana hai, mira mukhtasar sa fasaana hai
yahi, ab jo baar hai dosh par, yahi sar thha zaanu-e-yaar par

yeh kamaal-e-ishq ki saazisheiN, yeh jamaal-e-husn ki naazisheiN
yeh inaayateiN, yeh nawaazisheiN, miri ek musht-e-ghubaar par

miri samt se use ai sabaa! yeh payaaam-e-aakhir-e-gham sunaa
abhi dekhna ho, tau dekh ja, ke khizaaN hai apni bahaar par

yeh fareb-e-jalwa hai sar ba sar, mujhe Dar yeh hai, dil-e-bekhabar!
kahiN jam na jaaye tiri nazar, inhiN chand naqsh-o-nigaar par

haiN raheen-e-dard sahi, magar, mujhe aur chhahiye kya? Jigar!
gham-e-yaar hai mira shayfta, maiN farayfta gham-e-yaar par

JIGAR MORADABADI