taazah tareen ghazal - -- - : Abdullah Nazir.

[Abdullah Nazir]

MuHtaramaat o MuHtarameen
Arbab-e-MeHfil aur aHbaab-e-sukhan,

PurkhulooS Tasleemaat, :rose

Apni aek taazah tareen ghazal pesh karne kii saAadat HaaSil karrahaa hooN. Ummeed ke aap apne giraaNqadr tabSire se navaazkar shukriya adaa karne kaa mauqaA denge.

GHAZAL roman meiN:

Baat zindaaN ki hei zikr-e-rasan o dar bhi hei
Koii ManSoor kahiN barsar-e-paikaar bhi hei?

yooN tou lazzat-kash-e-sheereeniy-e-guftaar bhi hei
dil magar aapki zulfaoN meiN giriftaar bhi hei

haye is maikada-e-Aalam-e-faani kaa nasha
jo bhi hei rind-e-balaanoush ziyaaNkar bhi hei

apni nazraoN ko nah rakh qaSr-e-Tarab tak maHdood
dast bastah tiraa saayil pas-e-deewar bhi hei

baAd-e-ghaflat nigah-e-luTf bhi hei Tarz-e-karam
dushman-e-jaaN bakhudaa moonis o dildaar bhi hei

talkhiy-e-raah-e-muHabbat se shikastah dil hooN
jaaN se pyaaraa mujhe maHboob ka darbaar bhi hei

sar jhukaaletaa hei aafaat-e-falak se Dar kar
yehi insaan jo mast-e-ma'y-e-pindaar bhi hei

shoAla-e-shamA-e-gham-e-dil se bachaati hei mujhe
jitni zaalim hei hawaa utni milansaar bhi hei

aa'o Nazir ke taghazzul kaa tamaashah dekheN
raqS-e-deewaanah bhi, zanjeer ki jhankaar bhi hei.
=======


Aapka MukhliS,
Nazir.