TARAHI GHAZAL - -- - (GUZ.19) by: ABDULLAH NAZIR.

[Abdullah Nazir]

MuHtaramaat o MuHtarameen
arbaab-e-meHfil aur aHbaab-e-sjukhan,

PurkhulooS Tasleemaat, :rose

Guzarish No.19 ke miSreA per apni TaraHi ghazal pesh karne kee saAadat HaaSil karrahaa hooN. Aapki giraaNqadr aaraa kaa intezaar rahegaa.

GHAZAL roman meiN:

bemuHaabaa barhami achee nahiN
apne dil se dushmani achchee nahiN

sarvo-qad kee sarkashi achchee nahiN
ham se Tarz-e-bartari achchee nahiN

ishq meiN begaanagi achchee nahiN
aa'ou mil baiTheN ghaRi achchee nahiN

gham nahiN achchaa khushi achchee nahiN
tum nahiN tou zindagi achchee nahiN

nishtar-e-mizhgaaN se kardo faislah
saaAataoN kee jaaNkani achchee nahiN

deeda-e-khooN-bastah kaa rakh le bharam
jaariHaanah be-rukhi achchee nahiN

ZabT-e-farT-e-karb-e-jaaN laazim sahi
Marg aasaa khaamushi achchee nahiN

MaiN kahaaN jaaoongaa koo-e-yaar se
Dar badar aawaaragi achchee nahiN

Zindagi bhar saath denaa hei to de
mausamaoN kee dousti achchee nahiN

rishta-e-ulfat hei ik rabT-e-baham
be-sabab kee badZani achchee nahiN

kaun kab TooTegaa :Nazir: kyaa khabar
aayeeneh se hamsari achchee nahiN.
=======


Aapka MukhliS,
Nazir.

[jawaid badauni]

Mohtarmee Abdulla nazir SaHib,
Aadaab

Nihayat moorassah Ghazal se nawazah hai
aap ne. Daad qubool farmaaiiyega. Chund ashAAr
Khusoosan bohat acche lage:


sarvo-qad kee sarkashi achchee nahiN
ham se Tarz-e-bartari achchee nahiN

Tarze bartaree ka jawaab nahiN.
Waah Waah. Kya achcha sher hai.

nishtar-e-mizhgaaN se kardo faislah
saaAataoN kee jaaNkani achchee nahiN

"Nishtare mizhgaaN" ka jawab nahin tha tou
"saaAatoN ki jaaNkanee" ka bhi jawaab nahiN.
Laajawaab sher hai.

deeda-e-khooN-bastah kaa rakh le bharam
jaariHaanah be-rukhi achchee nahiN

YahaN bhi aap ke dou fiqrey bohat pasand aaye:
"deeda-e-KhooN-basta" aur "jaarihaanah be-rooKhee."
Waah waah. Yeh zubaan aap hi istaimal kar sakte haiN.


Zindagi bhar saath denaa hei to de
mausamaoN kee dousti achchee nahiN

Kya kahna is mausamee dosti ka.
Kya taghazzul hai. Subhaan Allah.


kaun kab TooTegaa :Nazir: kyaa khabar
aayeeneh se dousti achchee nahiN.

Achcha maqta' hai. magar aap ne roman
meN "dostee" likha hai jab keh Urdu version
meN "hamsaree". Mere Khyaal se "hamsaree" hi ziyadah
munasib hai. Dekh lijiyega.

Mukammal Ghazal per meri daad aur mubarakbaad qubool kijiyega.

MuKhliS
Jawaid
=======

[farhan]

AS SALAMU AALAIKUM WA RAHMATULLAHI WA BARAKATUHU,

Ustaad-e-MoHtaram Janab Abdullah Nazir Saheb,

mujhay aap ki yeh ghazal bahut pasand aayii hai. her shair lajawaab hai.aap ki ghazleeN paRh kar main bahut mustafeed hota rehta hoon. aap ki ghazleeN bhi mayray liye nisaab ka darja rakhti haiN...

ek khubsoorat ghazal per mayri janib say daad Hazir hai.Qabool kar kay shukriya ka mouQa eenayat farmayeaga...

faQt

Talib-e-dua

farhan

[zmufti]

Mohtaram Nazir saheb
Tasleemaat
Mushairey maiN aap ki ghazal buhat pasand aayyii
aap ne kaafi mukhtalif kawafii ka intikhaab kiyya hai aur mazameen bhee khoob haiN
mujh nacheez ki jaanib se daad qabool kijye
wasalaam
zmufti

[Abdullah Nazir]

MuHtarami o Azeezi
Jawaid Badauni SaaHib,

PurkhulooS Tasleemaat,

Aapke tafSeeli TabSireh meiN apni TaraHi ghazal kee pazeerayi ke liye aapka tah-e-=dil se shukrguzaar hooN. Ummeed karta hooN ke aayindah beeh aap isi TaraH se meri HauSlah afzaayi farmaate rahenge.


Aapka MukhliS,
Nazir.

[haamidbaaqri]

salaamun alaikaum
mohtaram abdullah nazir saahib

ustadaanah kalaam

bahut kuch seekhna hai hame.n aapse

is behtareen kalaam per hamaari dilee daad aur mubarakbaad qubool farmaaye.n

tifle maktab
haamidbaaqri