Allamah Iqbal se guftagoo....................HiSSah (1+2)

[yasir shah]

assalamOa'alikum

aik puraanaa naadir maZmoon dastyaab hu.aa, sochaa aap logoN ke saamne isay paish karooN tawaalat-e-maZmoon ke paish-e-nazar aur raftaar-e-teHreer ko madd-e-nazar raKhtay hu.e is ko aqsaat meN taqseem kiyaa jaa.e gaa -mandarjah.zel guftagoo chooNkeh doobadoo naheeN liHaazaa :MuHtaram Ahmed Afzaal: ne jawaabaat ba.ma' Hawaalahjaat paish kiye heN -

tawajjoh farmaaiye:

Allamah Iqbal se guftagoo

Ahmed Afzaal

aap ke khayaal meN shaai'ree kyaa cheez hay ?

deKhiye ! jazbaat-e-insaanee ki takhleeq yaa be.daaree ke ka.ee zaree.'ay heN, in meN se aik she'r bhi hay ~(Iqbaal.naamah-jild duwwum safHah 271)~ shaai'ree dar.aSl saaHiree hay or shaa.'ir kaa farZ hay keh qudrat ki laazawaal dolatoN meN se zindagee or quwwat kaa jo HiSSah isay diKhlaayaa gayaa hay,us meN oroN ko bhi shareek karay-~(muqaalaat-e-Iqbaal S-188)~


kon saa she'r kaamyaab she'r qaraar diyaa jaa saktaa hay ?

jisay tum kaamyaab she'r kehte ho woh aur cheez hay aur ma'yaar par pooraa utarnay waalaa she'r aur cheez hay-woh shaai'ree jo "art" ke Haqeeqee ma'yaar par pooree utartee hay paiGhambaree kaa juzw hay -woh shaai'ree jo is ma'yaar par pooree utray yaa nah utray laiken fannee ma'yaar par pooree utartee ho, kaamyaab ,shaai'ree hay ~(anwaar-e-Iqbal S-36)


aap aik shaai'r ki Heciyat se mash.hoor heN - kyaa is baat ko aap pasand bhi kartay heN ?

agarcheh log bad.qismatee se mujhe ba.Heciyat aik shaai'r hi ke jaantay heN , laiken meN shaai'r ki Heciyat se shohrat kaa aarzoomand naheeN hooN-~(Iqbaal.naamah,jild duwwum-S-141)


aap ne shaai'ree ko kyaa soch kar apnaayaa?

meraa maqSad shaai'ree se shaai'ree naheeN balkeh yeh hay keh auroN ke diloN meN bhi wuhee khayaalaat mojzan ho jaa.eN jo mere dil meN heN~(anwaar-e-Iqbaal,S -287)~


aap ki nazmeN is qadar maqbool kyooN heN ?

mere kalaam ki maqbooliyat meHZ faZl-e-aizdee hay warnah apne aap meN koi hunar naheeN deKhtaa-~(Iqbaalnaamah, J- awwal, S-235)


aap aik falsafee bhi heN zaraa falsafay ki ta'reef keejiye ?

falsafah naam hay insaan ki dimaaGhee kaawishoN kaa-yeh kaawisheN aakhir insaanee heN , in meN yaqeen kaa rang paidaa naheeN ho saktaa-~(Iqbaal ke HuZoor, S-62)~


Islaam ko aap kyaa samajhte heN ?

Islaam jaisaa keh meN baarhaa keh chukaa hooN , deen hay , mazhab naheeN hay ~(Iqbaal ke HuZoor, S-76)~yeh aik waHdat hay jis meN fard aur jamaa.a't ko juzw-e-kul kaa saa ta'lluq HaaSil hay -~(Iqbaal ke HuZoor, S-288)~ Islaam zaatee raa.ay kaa mu'aamlah naheeN hay ~(Harf-e-Iqbaal)~ is meN zindagee ki be.panaah quwwat hay ~(Iqbaal ke HuZoor, S-26)


nabee kareem Sallallah.u.a'laih.i.wasallam ki zaat ke muta.a'lliq kuCh irshaad farmaaiye?

woh daanaa-e-subul khatm-ur-rusul molaa-e-kul jis ne
Ghubaar-e-raah ko bakhshaa faroGh-e-waadi-e-seenaa
nigaah-e-i'shq-o-mastee meN wuhee awwal wahee aakhir !
wuhee qur.aaN , wuhee furqaaN, wuhee yaaseen ,wuhee taahaa

kyaa islaam kaa mustaqbil roshan hay?

kitaab-e-millat-e-baiZaa ki Phir sheeraazahbandee hay
yeh shaakh-e-haashmee karnay ko hay Phir barg-o-bar paidaa

kyaa aap is ke aacaar deKh rahay heN ?

dunyaa-e-islaam meN aik zehnee inqilaab ke aacaar paidaa heN -magar yeh qomeN abhee tak apnay siyaasee aur iqtiSaadee mushkilaat meN uljhee hu.ee heN - in mushkilaat ke khaatmay par zehnee inqilaab kaa aaGhaaz yaqeenee hay-aur us waqt tak ummeed hay keh aise aadmee paidaa ho jaa.eN ge jo is inqilaab ki SaHeeH rahnumaaee kareN gay ~(Iqbaalnaamah, J-2, S-348)~


ummat-e-muslimah ki falaaH kis shay meN muZmir hay ?

gar too mee khuwaahee musalmaan zeestan
neest mumkin juz baqur.aan zeestan
barkhur.az.qur.aaN agar khuwaahee cabaat
dar Zameerash deedah am aab-e-Hayaat
chooN guhar dar rishtah-e-oo suftah shoo
warnah maanind-e-Ghubaar-e-aashuftah shoo

Qur.aan-e-Hakeem se aap kaa gehraa lagaao bhi mash.hoor hay -kyaa aap apnay falsafay ko qur.aan hi se maakhooz samajhtay heN ?

fikr-e-man gardooN muyassar az faiZ Ost
joo-e-saaHil naapazeer az faiZ Ost


ittihaad-e-millat ke muta.a'lliq aap kaa tasawwur kyaa hay?

aik hoN muslim Haram ki paasbaanee ke liye
neel ke saaHil se lay ker taa.ba.khaak-e-kaashGhar

kyaa musalmaanoN kaa baahimee ikhtilaaf aur aapas ki laRaaiyaaN hi un ke zawaal aur barbaadee kaa sabab naheeN?

yaqeenan ! naslee aur ai'tqaadee ikhtilaafaat meN tang. nazaree aur ta.a'SSub ne musalmaanoN ko tabaah kar diyaa hay ~(guftaar-e-Iqbaal, S18)~ hamaaray masaa.il kaa aik hi Hal hay aur woh hay ittiHaad ,musalmaan muttaHid ho ga.ay to un ki judaagaanah qomiyyat tasleem kar lee jaa.ay gee to ham aazaadee se apnaa mustaqbil ta'meer kar sakeN gay-~( Iqbaal ke HuZoor,S-46)~


aap ne apnee nazm "wataniyat " meN watan parastee par shadeed tanqeed farmaa.ee hay , kyaa aap Hubb.ul.watanee ke bhi khilaaf heN?

jee naheeN, aap ko muGhaaltah huwaa -watan se muHabbat raKhnaa aur us ki i'zzat ke liye marnaa musalmaanoN ke liye juzw-e-eemaan hay magar wataniyat us waqt islaam se Takraatee hay jab yeh aik siyaasee taSawwur ki Haiciyat se kaam kartee hay aur insaane ijtimaai'yat kaa uSool honay kaa da'waa kartee hay ~(taqaareer-o-farmoodaat-e-Iqbaal,S-141)~


nazm wataniyat meN mulk-o-watan ko aap ne but se tashbeeh dee hay -is ki waZaaHat farmaaiye_

watanparastee bhi butparastee ki aik naazuk Soorat hay -mukhtalif qomoN ke watanee taraanay mere is da'way kaa cuboot heN keh watan.parastee aik maaddee shay ki parastish se i'baarat hay -Islaam kisee Soorat meN but.parastee ko gawaaraa naheeN kar saktaa-~(shzraat-e-fikr-e-Iqbaal, S-83)~


"congress" ke watanee qomiyyat ke nazariye se musalmaanaan-e-hind ko ikhtilaaf kyooN huwaa?

fil.Haqeeqat jis cheez ko ahmiyat HaaSil hay aadmee kaa a'qeedah , us ki tehzeeb aur us ki taareekhee riwaayaat -yeh cheezeN is qaabil heN keh jin ki khaatir aadmee kaa jeenaa marnaa ho nah keh zameen kaa woh TukRaa jis ke saath 'aarZee tor par rooH-e-insaanee kaa waastah ho gayaa ho-~(taqaareer-o-farmoodaat-e-Iqbaal, S-56)~


aap ne aik a'laiHidah Islaami riyaasat kaa nazariyah kis khayaal ke taHt paish farmaayaa ?

meN ne Sirf Hindustaan aur Islaam ke falaaH-o-behbood ke khayaal se aik munazzam Islaamee riyaasat ke qayaam kaa mutaalibah kiyaa hay , is se Hindustaan ke andar tawaazun-e-quwwat ki badolat amn-o-amaan qaaim ho jaa.ay gaa aur Islaam ko is amr kaa moqa' milay gaa keh woh in acaraat se aazaad ho kar jo a'rabee shahnshaahiyat ki wajah se ab tak is par qaaim heN , us jamood ko toR Daalay jo is ki tehzeeb ,tamaddun , sharee.a't aur ta'leem par SadiyoN se taaree hay , is se nah Sirf un ke SaheeH ma'aanee ki tajdeed ho sakay gee balkeh woh zamaanah-e-Haal ki rooH se bhi qareeb.tar ho jaa.eN gay-~(mazaameen-e-Iqbaal, S-121)~


kyaa aap samajhtay heN keh aik alag riyaasat qaaim ho jaa.e gee?

mujhe to aisaa hi nazar aataa hay -~(maZaameen-e-Iqbaal , S-119)~


aap ke khayaal meN qayaadat kaa islaami ma'yaar kyaa hay ?

nigah buland , sukhan dilnawaaz , jaan pur.soz
yahee hay rakht-e-safar meer-e-kaarwaaN ke liye

Hindustaan ke mojoodah Haalaat meN aap ko koi aisaa shakhS nazar aataa hay jo musalmaanoN ki rah.numaai kar sakay -

"Jinnah" ke siwaa koi shakhS musalmaanoN ki qayaadat kaa ahl naheeN ~(Iqbaal ke HuZoor ,S-298)~


kyaa 'aam musalmaan bhi yahee khayaal raKhtay heN ?

yaqeenan, Hindustaani musalmaan "Mr. Jinnah " se mutawaqqe' heN keh is pur.aashob dor meN un ke mustaqbil ke muta.a'lliq un ki kaamil aur waaZeH.tareen rah.numaai kareN gay-


Ghulaamee aur aazaadee meN kyaa farq hay ?

Ghulaamee kyaa hay zoq-e-Husn-o-zaibaaee se meHroomee
jisay zebaa kaheN aazaad banday hay wahee zaibaa
bharosah kar naheeN saktay GhulaamoN ki baSeerat par
keh dunyaa meN faqat mardaan-e-Hur ki aanKh hay beenaa !

millat ki tashkeel O istiHkaam ke liye kyaa cheez sab se zyaadah Zarooree hay ?

yaqeeN afraad kaa sarmaayah-e-ta'meer-e-millat hay
yeh woh quwwat hay jo Soorat.gar-e-taqdeer-e-millat hay

-------------------------------------------------jaaree hay