Ghazal-"jafaa woh apnoN pe karte haiN kuch siwaa akcar

Post by **Daanish** » Sun Aug 27, 2006 4:18 pm

azeezaan-e-bazm
aadaab
ek Ghazal pesh-e-Khidmat hai. mulaHeza farmaaiye aur apni aara se nawaaziye.
Daanish

jafaa woh apnoN pe karte haiN kuchh siwaa akcar
zabaan-e-Ghair se bhi hum ne yeh sunaa akcar

gurez karta hai aane se mere KhwaaboN meiN
woh shaKhs jo miri neendeiN uRaa gaya akcar

ajeeb shai hai tiri kaj_rawi ai charKh-e-kuhan
qadam qadam pe sitam ik naya hua akcar

barasne lagti hai aatish du'a-e-baaraaN par
hui hai apni du'a yuN bhi narasaa akcar

mire hi dum se munawwar thhi teri bazm-e-tarab
ba_rang-e-sham'a mira dil yahaN jalaa akcar

zameen-e-shayr bhi kya sanglaaKh hai Daanish
ke is meiN teesha-e-fan kund ho gaya akcar

Abdullah Nazir · Post by **Abdullah Nazir** » Wed Aug 30, 2006 9:12 am

MuHtarami
Daanish SaaHib,

PurkhulooS Tasleemaat,

Aapki ghazal bahut pasand aayi jiske liye meri dili daad aur mubaarakbaad qubool farmaayiye.

MULAAHIZAAT:

jafaa woh apnoN pe karte haiN kuchh siwaa akcar
zabaan-e-Ghair se bhi hum ne yeh sunaa akcar

Bahut achchi maTlaA hei, waah waah.

gurez karta hai aane se mere KhwaaboN meiN
woh shaKhs jo miri neendeiN uRaa gaya akcar

Pahle miSreA ko badalne kee koushish keejiy tou behtar hei kiyunkeh "mere khwaabaoN meiN aane se" kaa maTlab yeh le rahe heiN "wo mujhe apne khwaabaoN meiN aane se rouktaa hei". Housaktaa hei ke yeh meraa quSoor-e-fehm hou.

ajeeb shai hai tiri kaj_rawi ai charKh-e-kuhan
qadam qadam pe sitam ik naya hua akcar

Bahut khoob, waah waah.

barasne lagti hai aatish du'a-e-baaraaN par
hui hai apni du'a yuN bhi narasaa akcar

Bahut khoob, waah waah.

mire hi dum se munawwar thhi teri bazm-e-tarab
ba_rang-e-sham'a mira dil yahaN jalaa akcar

Waah waah, kyaa kehne.

zameen-e-shayr bhi kya sanglaaKh hai Daanish
ke is meiN teesha-e-fan kund ho gaya akcar

Bahut khoob maqTaA hei, waah waah.

Aapka MukhliS,
Nazir.

Post by **ahm4me** » Wed Aug 30, 2006 9:56 am

gurez karta hai aane se mere KhwaaboN meiN
woh shaKhs jo miri neendeiN uRaa gaya akcar

Mohtaram Danish Bhai
Adab

Ghazal pasand aai, khas ker darj bala shair,

daad hazir hay,

mukhlis,
Muhammad Ahmed.

Post by **Daanish** » Wed Aug 30, 2006 2:32 pm

Sara SaHeba
aadaab-o-tasleemaat
Ghazal ki pazeerayi ke liye aap ka shukrguzaar huN.
hausla afzaai ke bohat bohat shukriyah
basad Khuloos
Daanish

Post by **Daanish** » Wed Aug 30, 2006 2:37 pm

MoHatarami Nazir SaHeb
aadaab
Ghazal tafseel se paRHkar tabsirah farmaane ke liye aap ka ehsaanmand huN. umeed hai ke aap mustaqbil meiN bhi hum sab ki rehnumaayi apne mushfiqaana andaaz meiN isi taraH farmaayenge.
aap ka kehna durust hai. is misre'a ko badalne ki koshish karunga--
'gurez karta hai aane se mere KhwaaboN meiN'

aap ka mamnoon huN.
ijaazat
Daanish

Post by **Daanish** » Wed Aug 30, 2006 2:39 pm

mukarrami Mohammed Ahmed SaHeb
aadaab
Ghazal ki pazeeraayi ke liye izhaar-e-tashakkur pesh kar raha huN.
qubool farmaaiye.
aap ka muKhlis
Daanish

Post by **Mayank** » Thu Aug 31, 2006 10:40 am

Daanish saahab,

Aadab arz hai,

ek dil kaSh takhleeq peSh ki hai aap ne... sabhii Sher behad achchhe lage..

Ek khuubsuurat Ghazal ke liye mere jaanib se daad ke saath mubaarak baad qubool kareN.... yuuN hee bazm ko roShan raKhiye...

aap ka,

Mayank

Post by **Daanish** » Thu Sep 07, 2006 2:39 am

Mayankji
Ghazal pasand farmaakar daad se nawaazne ke liye shukriyah.
hausla afzaai ke liye aap ka mamnoon huN.
Khair andesh
Daanish