Main ik kaaghaz ka tukrra hooN

[poetrazi]

Main ik kaaghaz ka tukrra hooN
Keh jis k ik taraf janaaN bohat say naam likhay haiN
Phir un mit_tay huay bayrang naamoN par
Jali harfoN sy ujla sa tumhaara naam likha hy
Aur us k doosri jaanib koi payghaam likha hy
Tumharay naam likha hay
Mujhay tum gum nahiN karna

Agar chaaho to kaapy(coppy) ya kisi bhi dairy maiN ik nishaani ban k reh looN ga
Kisi nakaam chahat ki nishani ban k reh looN ga
K gar tanhaai main chaaho mujhay kholo ,parho aur phir wahiN rukh do
Yeh tum par munhasir ho ga mujhay chaahay kahiN rukh do
Agar chaaho to apnay dil maiN hi mujh ko jagah dayna
KahiN ghazloN ya shayroN ki kitaaboN maiN saja dayna
Mujhay tum gum nahiN karna

Mujhay tum roz mat parrhna
Keh mumkin hy kabhi mayri koi boseeda teh mujh say alag ho kar tumharay haath aa jaay
Zamaany k labon par phir yoonhi koi baat aa jaay

MaiN aysa phool hooN jis ko kisi nay apnay haathoN sy
kisi tehni sy torra tha
barri shiddat sy chooma tha
main un haathoN ki aur hontoN ki hiddat bhi abhi mehsoos karta hooN
mujhay tum gum nahiN karna

mujhay tum ny utha kar aaj zulfon main sajaaya hy
labon sy bhi lagaya hy
tumhaari dastaras main hooN to ab paymaan maiN rakhna
agar mumkin na ho to phir bhi tum imkaan maiN rakhna
mujhay guldaan main rakhna

main aysa khaab hooN jis ko kai aankhon ny daykha tha
bohat baykhaab aankhaiN theeN
mujhay taknay ki khaahish maiN na ik pal bhi jhapakti theeN
mujhay tum aankh main rakhna
mukamal daastaN ka ik adhoora baab mut karna
mujhay bay khaab mat karna

kaai haathoN , kai hontoN
kitaaboN ,kaapioN ,aankhoN k rustay ab
tumhaaray paas aaya hooN
mujhy tum dairy,guldaan main ,aankhoN main ya dil main
jahaN chaho jaga dayna
magar bas gum nahin karna

razi-ud-din razi

[Abdullah Nazir]

MuHtarami
poetrazi SaaHib,

PurkhulooS Tasleemaat,

Aapki yeh aazaad nazm pahli baar paRhne ko mili jo bahut he dilkash aur tasalsul-e-fikr ke liHaaz se bahut hee murattab.

Is kaamyaab takhleeq per meri jaanib se dili daad aur mubaarakbaad qubool farmaayiye.


Aapka MukhliS,
Nazir.

[Mahtab Qadr]

Janab Razi Uddin Razi sahib
salaam e masnoon
Aap ki nazm parhi , bahut pasand aai. khaas taur par ehsaasaat ki khoobsoorti, fikr ka tasalsul aur nazm ke format mai kahiN bhi koi jhool ka na hona aake kuhna mashq sukhanwar hone ki daleel hai. bahut khoob agar nazmeiN aisi kahi jaiN to phir baat hi kia hai, warna umooman net par azad shayeri ke naam par nacri nazmeiN likhi jaati haiN jo shayer ke nazuk mizaaj par giraani ka sabab hoti hiaN. mai kisi nacri shayer ki mukhalifat nahi kar raha hoN ,har aadmi apni tahreer o taqreer mai azaad hai, mai sirf apni pasand aur apne mizaj ka zikr kar raha hoN. baharhaal aapki nazm ne mustaassir kia, is bahetreen nazm par MUBARAKBAAD.
Shukria
Mahtab Qadr

[Star Mind]

Jnaab razi bhai, aadaab

aap ka nehaayat mamnoon hoN k aap ne itnee KhoobSoorat taHreer yahaaN chaspaaN kardee ! nazm apnee micaal aap hai ! mahtab SaaHib ne bohut u'mdah tabSira kiyaa hai ! nazm bohut Khoob hai , har liHaaz se ! is KhoobSoorat taHreer par aap ka shukrguzaar hoN ! daad Haazir hai

shukriya

Zia Baloch

[poetrazi]

MuHtarami
poetrazi SaaHib,

PurkhulooS Tasleemaat,

Aapki yeh aazaad nazm pahli baar paRhne ko mili jo bahut he dilkash aur tasalsul-e-fikr ke liHaaz se bahut hee murattab.

Is kaamyaab takhleeq per meri jaanib se dili daad aur mubaarakbaad qubool farmaayiye.


Aapka MukhliS,
Nazir.

nazir sahib bohat shukria pazeeraai ka
thanx
razi

[poetrazi]

Janab Razi Uddin Razi sahib
salaam e masnoon
Aap ki nazm parhi , bahut pasand aai. khaas taur par ehsaasaat ki khoobsoorti, fikr ka tasalsul aur nazm ke format mai kahiN bhi koi jhool ka na hona aake kuhna mashq sukhanwar hone ki daleel hai. bahut khoob agar nazmeiN aisi kahi jaiN to phir baat hi kia hai, warna umooman net par azad shayeri ke naam par nacri nazmeiN likhi jaati haiN jo shayer ke nazuk mizaaj par giraani ka sabab hoti hiaN. mai kisi nacri shayer ki mukhalifat nahi kar raha hoN ,har aadmi apni tahreer o taqreer mai azaad hai, mai sirf apni pasand aur apne mizaj ka zikr kar raha hoN. baharhaal aapki nazm ne mustaassir kia, is bahetreen nazm par MUBARAKBAAD.
Shukria
Mahtab Qadr

mahtab sahib aap ny itni muhabat sy saraha hamari is nazm ko k ji khush ho gia boht nawazish aap ki
thanx
razi

[poetrazi]

Jnaab razi bhai, aadaab

aap ka nehaayat mamnoon hoN k aap ne itnee KhoobSoorat taHreer yahaaN chaspaaN kardee ! nazm apnee micaal aap hai ! mahtab SaaHib ne bohut u'mdah tabSira kiyaa hai ! nazm bohut Khoob hai , har liHaaz se ! is KhoobSoorat taHreer par aap ka shukrguzaar hoN ! daad Haazir hai

shukriya

Zia Baloch

shukria zia sahib

razi

[poetrazi]

Razi sahib,

nazuk jazbon se bharpoor aapki khoobsurat

nazm bohat pasand aayi. daad qubool keejiye.

sara

shukria sara ji
thanx
razi

[ahm4me]

Mohtaram Razi Bhai
Adab,

Umeed hay ba kairiyat hooN ge, aap ki nazm paRhi aur bohat pasand aai, aap ne is nazm mian ahsaasat ko bohat mulaim bunat ka jama pehnaya hay, is khush rang poshaak nazm per meri janib se mubarakbad qabool kejay, daad hazir hay,

Mukhlis,
Muhammad Ahmed

[poetrazi]

Mohtaram Razi Bhai
Adab,

Umeed hay ba kairiyat hooN ge, aap ki nazm paRhi aur bohat pasand aai, aap ne is nazm mian ahsaasat ko bohat mulaim bunat ka jama pehnaya hay, is khush rang poshaak nazm per meri janib se mubarakbad qabool kejay, daad hazir hay,

Mukhlis,
Muhammad Ahmed

ahmed sahib aap ko nazm pasand aai yeh jan kar humain khushi hui
thanx
razi