aek saadah see taazah ghazal - -- - Abdullah Nazir

[Abdullah Nazir]

MuHtaramat o MuHtarameen
arbaab-e-meHfil aur aHbaab-e-sukhan,

PurkhulooS Tasleemaat, :rose

Apni aek maAmooli aur saadah see ghazal pesh karrahaa hooN. Ummeed ke aap apni aaraa se mustafeed houne kaa mauqa denge.

GHAZAL roman meiN

Khud se kyaa dushmani baRh gayi
Aap se dousti baRh gayi

Gul kee khandah labi baRh gayi
Meri dil kee lagi baRh gayi

Jab wo meh-rukh houaa hamqadam
Raah meiN raushni baRh gayi

Dasht-e-ghurbat meiN kyaa bus gaye
Aur deewanagi baRh gayi

naagahaaN kis ne dhoukah diyaa
chashm-e-nam kiyuN nami baRh gayi

besabab wo khafaa hougaye
baat kuch bhee nah thee baRh gayi

dard-e-dil baRh gayaa aur bhee
jab se chaarah gari baRh gayi

ham se aakhir houee kyaa khaTaa
kis liye be-rukhi baRh gayi

iHtimaal-e-mulaaqaat per
shaam-e-gham khudsari baRh gayi

chashm-e-Nazir hei tar sarbasar
hijr kee teeagi baRh gayi
=======


Aapka MukhliS,
Nazir.

[Shummu]

Khud se kyaa dushmani baRh gayi
Aap se dousti baRh gayi

wah..!!

Jab wo meh-rukh houaa hamqadam
Raah meiN raushni baRh gayi

wah wah wah haasil-e-ghazla sher...!!!

besabab wo khafaa hougaye
baat kuch bhee nah thee baRh gayi

sahi kaha aksar aisa ho jaata hai ke bin baat ke baat bahut barh jaati hai...

dard-e-dil baRh gayaa aur bhee
jab se chaarah gari baRh gayi

wah..!

ye parhke apna ek puraane sher yaad aa gaya...

us ne jab bhi hameN kuchh Dilaasa diyaa
dard-e-dil aur bhi baRh gayaa,kyaa kareiN!

chashm-e-Nazir hei tar sarbasar
hijr kee teeagi baRh gayi

wah wah kya maqta hai...!


Mohtaram Nazir Sahab..meri jaanib se daad pesh hai is saada si magar acchi ghazal pe

Shumaila

[Muzaffar Ahmad Muzaffar]

Garamee-e-qadr Janaab Abdullah Nazir SaHeb aadaab!

aap kee tazah Ghazal dekh~ne ka sharf naSeeb huwa. bohot u'mdah asha'aar kahe haiN aap ne.

ch~oTee beHer meN aap kee yeh koshish baRee dilkash hai. mujh~e sabh~ee she'er bh~ale lage haiN.



Khud se kyaa dushmani baRh gayi
Aap se dousti baRh gayi

bohot khoob !waah! waah!

Gul kee khandah labi baRh gayi
Meri dil kee lagi baRh gayi

kiYa kehne! waah! waah!

Jab wo meh-rukh houaa hamqadam
Raah meiN raushni baRh gayi

bohot khoob waah waah!! bohot baRee bat keh dee hai aap ne! waah! =D>

Dasht-e-ghurbat meiN kyaa bus gaye
Aur deewanagi baRh gayi

kiya kehne!! waah! =D>

naagahaaN kis ne dhoukah diyaa
chashm-e-nam kiyuN nami baRh gayi

waah waah!!

besabab wo khafaa hougaye
baat kuch bhee nah thee baRh gayi

kiYa kehne!! waah bohot khoob Nazir SaHeb!!

dard-e-dil baRh gayaa aur bhee
jab se chaarah gari baRh gayi

bohot khoob waah waah waah kiya kehne!! =D>

ham se aakhir houee kyaa khaTaa
kis liye be-rukhi baRh gayi

kiYa kehne! waah!!

iHtimaal-e-mulaaqaat per
shaam-e-gham khudsari baRh gayi

waah waah!!

chashm-e-Nazir hei tar sarbasar
hijr kee teeagi baRh gayi

bohot khoob waah! waah!

bohot khubSurat she'er kahe haiN aap ne lut^f hee aa geYa. aesee GhazleeN hee dil-o-jaaN ko qareer bakhsh saktee haiN. bohot u'mdah!

meree janib se dilee dad aor mubarak baad qubool kijiye!

ijazut chahooN ga!

Wassalam
muz^affar

[Abdullah Nazir]

Azeezah
SHUMMU

PurkhulooS Tasleemaat,

Apni ghazal per aapke tafSeeli tabSireh ke liye beHad shukrguzaar hooN.

Javaab dene meiN ta'kheer ke liye muAafi chaahtaa hooN.


Aapka MukhliS,
Nazir.