MuHtaramaat o MuHtarameen Arbaab-e-MeHfil aur aHbaab-e-sukhan,
PurkhulooS Tasleemaat, :rose
Guzarish 24 ke miSreA per apni TaraHi ghazal pesh
karne ki saAadat HaaSil karrahaa hooN. Ummeed ke aap apni giraaNqadr aaraa se navaazkar khaaksaar ko shukriyah adaa karne kaa mauqaA denge.
Ghazal roman meiN:
Sitam sehte houe guzre zamaane
Diyaa hei Sabr jaane kiyuN khudaa ne
Nah degaa dil gham-e-ulfat chupaane
Wo meri baat maane yaa nah maane
Agar mil baiTheN ham tum do diwaane
Tou shayad lauT aayen din puraane
Wo kyaa rouye gham-e-hasti kaa rounaa
Jise maaraa tiri kaafir adaa ne
gulistaaN naam kaa ab reh gayaa hei
nah wo jannat nah wo mausam suhaane
DilaoN meiN aatish-e-bughZ o Hasad hei
laboN per amn ke meeThe taraane
[align=center]moHtaram Abdulla Nazir SaHeb aadaab-o-tasleemat!
Guzarish 24 ke liYe aapkee Ghazal dekh~ne ka sharf mila. Ghazal ke sabh~ee asha'aar apna jawab aap haiN.
aap kee Yeh koshish fit^ree ustadanah SalaHiYatooN kee aae,nah daar ma'loom hotee hai.aap ne apnee quwwat-e-gaoYaee aor mafiZ^Z^ameer ko she'eree sanchooN meN Dh~aal kar Ghazal ke HaseeN aor dilfareb pekar meN utaar diYa hai. is meN shak-o-shubah kee koee gunja,ish naheeN reh jatee keh aap is tajribe meN kamYaab-o-kamraan huwe haiN.
aap ne har she'er ko dard-o-rajn ke aese meHlool meN Dubo kar nikala hai keh paRh~ne wale par a'jeeb iZ^t^rabee kaefiYat t^aree ho jatee hai. maiN zatee t^aor par is Halat ko meHsoos karte huwe raqam t^araaz hooN aor apne meHsusaat aor eHsaasaat ke zer-e-acar ho kar iz^haar-e-rae,Y kar raha hooN.
miSrooN ka bahamee rabt^ qabil-e-dad hai.asha'ar meN waqt ke badalte huwe taqaZ^e aor fikree irteqa samajh~ne se taa'luq rakh~ta hai. maZ^ameen kee nudrat aor ach~ota pan aap hee ka t^urrah-e-imteYaaz hai.
Sitam sehte houe guzre zamaane
Diyaa hei Sabr jaane kiyuN khudaa ne
waah! waah!
Nah degaa dil gham-e-ulfat chupaane
Wo meri baat maane yaa nah maane
waah! waah!!
Agar mil baiTheN ham tum do diwaane
Tou shayad lauT aayen din puraane
waah! jee waah!
Wo kyaa rouye gham-e-hasti kaa rounaa
Jise maaraa tiri kaafir adaa ne
kiYa kehne!! waah!! waah! bohot khoob!!
gulistaaN naam kaa ab reh gayaa hei
nah wo jannat nah wo mausam suhaane
bohot khoob!! waah! waah!!
DilaoN meiN aatish-e-bughZ o Hasad hei
laboN per amn ke meeThe taraane
mohtaram aap kee Ghazal k baare meiN kyaa kaheN, juz is ke, k hamesha kee tarah yeh Ghazal bhi bohat pasaNd aa'ee.
is kalaam meiN aap ne aasaan lafzoN ka istemaal ziyadah kiyaa jis se samjhne meiN bhii dushvaari na huii, lehaaza is haseen-o-jameel Ghazal par miree jaanib se dilee daad aur mubaarak-baad qubool keejiYe.
Shukriyah!
Hassan
Last edited by hassan_bashir on Thu Dec 07, 2006 5:13 am, edited 1 time in total.
Urdu hai jis ka naam hamiiN jaante haiN :Daagh:
saare jahaaN maiN dhum humaari zubaaN ki hai
Mashallah bahut hi khoobsurat ghazal peesh ki hai aap nay....bahut luft aaya aap ki ghazal paRha kar .....Daad Hazir-e-Khidmat hai...Qabool farmayeaga....
Aapka giraNqadr tabSirah paRhkar HauSalah baRhjaataa hei ke mujhe apni mashq-e-sukhan jaari rakhni chaahiye.
Apne ashAar meiN zindagi ke daakhili aur khaariji ehsaasaat kaa izhaar houjaataa hei jisko maiN apni khush-qismati samajhtaa hooN. Aap jisko maa-fi-Zameer samajhte heiN aur baAZ aHbaab mazaameen kehte hein wo mere liye laa-shaAoori Taur per izhaar-e-Haal hei. BaharHaal, maiN aapki inaayat aur muHabbat ke liye tah-e-dil se shukrguzaar hooN.
Aapka MukhliS,
Nazir.
Last edited by Abdullah Nazir on Fri Dec 08, 2006 1:59 pm, edited 1 time in total.
Allah taala aap ka sayaa urdu ke chahnoaN waloaN ke sir par salamat rakhay.
Mein ne uss waqt tak aap ki ghazal na parhi jub tak apni likh na lee. Kia khoobsoorat ghazal kahi hai aap ne. kuhna mashqi kalam se kaise chhalakti hai ye koi kehne ki baat nahi. Saamne ke mazaameen se bach kar itne dhair sare ashaar ka kehnaa yaqenun aap jaise ustaad ka hi khaasa hai. Har qaari apne zouq ke mutabiq shairi se lutf andoz hota hai. aap ki ghazal aisi jamAe hai ke har tarah ke zouq ke leeaye kuch na kuch saaman mojood hai. Meri meelaan tabiyat ke mutabiq kuch shair aise haiN ke arsa tak mazaa daite rahaiN ge. un meiN se chand aik dobaraa tehreer karne ki jasarat kar rahaa hooN ta ke yaad bhi rakh sakooN
Sitam sehte houe guzre zamaane
Diyaa hei Sabr jaane kiyuN khudaa ne
ubb bata-aye bhala aadmi wah wah na kare to kia kare. kiss khoobsoorti se aap shikwa oar la mutnahi sabr ko yakjaa kar dia hae. bohat khoob sir. bohat khoob.
Wo kyaa rouye gham-e-hasti kaa rounaa
Jise maaraa tiri kaafir adaa ne
Aha hai. Kafir ada ka kia khoobsoorat istaAmal hai. agar koi aam sa shair bhi iss ghazal ke leeaye kafiaye ikathay karne baithe toa uss ki fehrist meiN ada ka lafz zaroor aa jaa-aye ga. Laikin adaa ko kafir adaa bana kar iss muharat se saja daine ka fun ya atia qudrat ho sakta hai ya barsaoN ki riazat. Oar aap ke ashhar se hamesha hi ye mehsoos hota hai ke aap donoaN dolatoaN se maala maal haiN.
DilaoN meiN aatish-e-bughZ o Hasad hei
laboN per amn ke meeThe taraane
wo ToofaanaoN se laRtaa jaarahaa hei
nah di furSat jise mauj-e-balaa ne
bohat khoob !
jahaaN meiN raushni karne kee khaaTir
jalaaDaale heiN apne aashiyaane
wah wah. kia khoobsoorat baat kehi hai sir aap ne. aashiyaane ko to har koi hi apni ghazal meiN jalana chahay ga laikin maqsidiat ke ye inteha. bohat khoobsoorat.
safeenah ghirne waalaa hei bahanwar meiN
kahaaN pahunchaadiyaa hei naakhudaa ne
wah wah.
naSeebah-war hei shaakh-e-gul chaman meiN
banaayaa ghonslah jab se bayaa ne
meiN apni kotah samjhi par maazarat khaa hooN ke iss shair ko nahi samajh sakaa.
gumaaN thaa mujh ko maiN zindah nahiN hooN
mujhe chaunkaadiyaa teri Sadaa ne
bohat khoob sir. bohat khoob. ooper wali ashhar ki mehviat meiN ye shair choonka hi daita hai
uThaaooN boujh kab tak zindagi kaa
jhuke jaate heiN yaarub mere shaane
naSeebah-war hei shaakh-e-gul chaman meiN
banaayaa ghonslah jab se bayaa ne
meiN apni kotah samjhi par maazarat khaa hooN ke iss shair ko nahi samajh sakaa.
Micaal ke Taur per aap is ibaarat per ghaur keejiye:
"Ahmed Faraz ke aane se Karachi ki raunaq baRh gayi". Mere khayaal meiN aisi ibaarat ko samjhne meiN aapko koii diqqat pesh nah aayegi.
Bayaa aek chiRyaa houti hei jo khoobSoorat aur achchaa ghoonslah banaane ke liye mash'hoor hei. Meraa maTlab hei is chiRiyaa ne jab se chaman kee shaakh-e-gul per ghoonslah banaayaa hei wo shaakh khush-qismat hougayi. Jo bhee chaman meiN aate heiN us shaakh ko khaas Taur per dilchuspi se dekhte heiN.
Iski tshreeH meiN mukhtalif loag kisi munaasibat per yeh sheAr duhraasakte heiN. Jaise aek doust ke paas koii mashoor aadami mehmaan aaye tou apne doust se keh sakte heiN:
naSeebah-war hei shaakh-e-gul chaman meiN
banaayaa ghonslah jab se bayaa ne
Agar aapko yaa kisi aur ko sheAr ke mafhoom per iAtiraaZ hou tou mujh se rujooA karsakte heiN ifhaam o tafheem ke liye.
Guzarish 24 ke miSreA per apni TaraHi ghazal ke baare meiN aap ne hameshah kee TaraH meri HauSalah-afzayi farmaayi hei jiske liye maiN tah-e-dil se shukrguzaar hooN. Aap jaise ahl-e-zauq-e-adab HaZraat ke hee Tufaail meiN khaaksaar apni mashq-e-sukhan jaari rakhne kee jasaart kartaa hei.
WEBMASTER wrote:
MuHtaramaat o MuHtarameen Arbaab-e-MeHfil aur aHbaab-e-sukhan,
PurkhulooS Tasleemaat, :rose
Guzarish 24 ke miSreA per apni TaraHi ghazal pesh
karne ki saAadat HaaSil karrahaa hooN. Ummeed ke aap apni giraaNqadr aaraa se navaazkar khaaksaar ko shukriyah adaa karne kaa mauqaA denge.
Ghazal roman meiN:
Sitam sehte houe guzre zamaane
Diyaa hei Sabr jaane kiyuN khudaa ne
Nah degaa dil gham-e-ulfat chupaane
Wo meri baat maane yaa nah maane
Agar mil baiTheN ham tum do diwaane
Tou shayad lauT aayen din puraane
Wo kyaa rouye gham-e-hasti kaa rounaa
Jise maaraa tiri kaafir adaa ne
gulistaaN naam kaa ab reh gayaa hei
nah wo jannat nah wo mausam suhaane
DilaoN meiN aatish-e-bughZ o Hasad hei
laboN per amn ke meeThe taraane
Yeh meri khushqismati hei ke aap ne meri ghazal per tafSeeli tabSirah farmaayaa aur pazeerayi farmaayi. Daad aur mubaarakbaad ke liye tah-e-dil se shukrguzaar hooN. Ummeed ke aayindah bhee khaaksaar kee isi TaraH se HauSalah afzaayi farmaate rahenge. Jazakallahu khair.